ពោធិ៍សាត់៖ ក្បាលដីជុំវិញបឹងព្រះពន្លៃសរុបមានចំនួន២៦០ក្បាលដី (គ្មានទិន្នន័យ៧ក្បាលដី) ស្មើនឹង២១៦គ្រួសារ។ ក្បាលដីដែលមិនប៉ះពាល់ជាមួយការកាត់ចំណីបឹង៥០ម៉ែត្រ ចំនួន៧០ក្បាលដី, ក្បាលដីដែលរងផលប៉ះពាល់ក្រោយកាត់៥០ម៉ែត្រ ពីខ្សែEL.0.77m ចំនួន១៩០ក្បាលដី ក្នុងនោះក្បាលដីកាត់ចំណីអស់ទាំងស្រុង ចំនួន៦៩ក្បាលដី និងក្បាលដីកាត់ចំណីនៅសល់ ចំនួន១២១ក្បាលដី ។ នេះបើយោងតាមរបាយការណ៍ក្នុងកិច្ចប្រជុំមួយ របស់រដ្ឋបាលខេត្តពោធិ៍សាត់និងមន្ទីរជំនាញពាក់ព័ន្ធ នៅព្រឹកថ្ងៃទី១៩ខែកក្កដាឆ្នាំ២០២៤ ស្តីអំពីការងារបោះបង្គោលកំណត់ព្រំដីរដ្ឋនិងដីចំណីបឹង សម្រាប់បងប្អូនប្រជាពលរដ្ឋដែលរស់នៅជុំវិញអាងទឹកបឹងព្រះពន្លៃ ក្នុងស្រុកតាលោសែនជ័យ។

ក្នុងឱកាសដឹកនាំកិច្ចប្រជុំនេះ ឯកឧត្តម ឡាយ វិសិដ្ឋ អភិបាលរងខេត្ត បានលើកឡើងថា បឹងព្រះពន្លៃគឺជាបឹងប្រវត្តិសាស្ត្រដែលមានជាយូរមកហើយ ដោយរាជរដ្ឋាភិបាលបានអភិឌ្ឍន៍បន្ថែមឱ្យក្លាយជាអាងទឹកព្រះពន្លៃ ដើម្បីរក្សាទឹកទុកស្រោចស្រពវិស័យកសិកម្ម ឃុំបាក់ចិញ្ចៀនស្រុកភ្នំក្រវាញ និងឃុំផ្ទះរុងស្រុកតាលោសែនជ័យ ។ ចំពោះការបោះបង្គោលកំណត់ព្រំគឺមានការអនុម័ត ពីគណៈអភិបាលខេត្ត និងគណៈកម្មការគ្រប់គ្រងដីរដ្ឋ ជាអ្នកសម្រេចកំណត់ផែនទីគោលស្រេចទៅហើយ ប៉ុន្តែកន្លងមកការបោះបង្គោលមិនទាន់បានបោះទាំងស្រុងទេ គឺបោះទៅលើដីរបស់បងប្អូនប្រជាពលរដ្ឋណា ដែលស្ម័គ្រចិត្តធ្វើជាគំរូគេ។

យោងតាមអនុក្រិត្យលេខ១៩៧ អាងទឹកបឹងព្រះពន្លៃគឺជាដីរបស់រដ្ឋ ដើម្បីគ្រប់គ្រងបម្រើផលប្រយោជន៍រួម មិនមែនអាស្រ័យលើបងប្អូនព្រមឬមិនព្រមនោះទេ។ អាងទឹកបឹងព្រះពន្លៃត្រូវរក្សានូវកម្ពស់០,៧៧ម ដែលមានផ្ទៃដី៣៤៧ហិកតា បូកនឹង៥០មទៀតជាចំណីបឹង។ ចំពោះការគ្រប់គ្រងដីរដ្ឋគឺត្រូវតែបោះបង្គោល បើបងប្អូនប្រជាពលរដ្ឋណាព្រមយកតាមចំណីបឹងដែលបានកំណត់ គឺខាងសុរិយោដីនឹងចេញប្លង់រឹងជូន ហើយដីណាដែលប៉ះពាល់ចំណីបឹងគឺមន្ទីរជំនាញមិនចេញប្លង់កម្មសិទ្ធជូននោះទេ តែប្រជាពលរដ្ឋអាចនៅអាស្រ័យផលជាបណ្តោះអាសន្នបាន ដោយមិនអាចសាងសង់ធំៗរឹងមាំបានទេ ។ ហើយការបោះបង្គោលកំណត់ព្រំ ដើម្បីសម្គាល់ថា ត្រឹមណាជាដីរបស់រដ្ឋ ត្រឹមណាជាដីរបស់ប្រជាពលរដ្ឋ ដើម្បីងាយស្រួលក្នុងការគ្រប់គ្រង។ បងប្អូននៅកន្លែងណាអាចនៅកន្លែងហ្នឹងបាន តែត្រូវទទួលស្គាល់កំពស់ទឹកនិងចំណីបឹងដែលរដ្ឋបានកំណត់។ប្រសិនបើរដ្ឋបោះបង្គោលកំណត់រួចហើយ បងប្អូនដកចេញ បងប្អូននឹងក្លាយជាជនល្មើសបំផ្លិចបំផ្លាញទ្រព្យសម្បត្តិរដ្ឋ នឹងត្រូវប្រឈមចំពោះមុខច្បាប់ជាធរមាន ។

គួរឱ្យដឹងដែរថា បឹងព្រះពន្លៃ ដែលមានមានឈ្មោះដើមថា បឹងព្រះពន្លាជ័យ គឺជាបឹងធម្មជាតិ មួយដ៏ធំលាតសន្ធឹងលើផ្ទៃដី២៧០ហិកតា ស្ថិតក្នុងឃុំផ្ទះរុង ស្រុកតាលោសែនជ័យ មានចម្ងាយ២៨គីឡូម៉ែត្រពីទីរួមខេត្តពោធិ៍សាត់ បឹងនេះជាតំបន់អេកូទេសចរណ៍មួយដ៏ទាក់ទាញ ព្រោះជាជំរំសត្វស្លាប និងជីវចម្រុះច្រើនប្រភេទ ។ ដោយសារបឹងព្រះពន្លៃគឺជាសម្បត្តិធម្មជាតិដ៏មានសក្កានុពល របស់ស្រុកតាលោសែនជ័យ ដែលអាចផ្តល់អត្ថប្រយោជន៍យូរអង្វែងដល់ប្រជាពលរដ្ឋ កន្លងមក ឯកឧត្តម កែវ រតនៈ ប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តពោធិ៍សាត់ បានស្នើរឱ្យមានការគ្រប់គ្រងអភិរក្សដីតំបន់បឹងព្រះពន្លៃឱ្យបានគង់វង្ស ជាសម្បត្តិរួម ហើយបឹងធម្មជាតិនេះមិនមែនជាកម្មសិទ្ធផ្តាច់មុខរបស់ប្រជាពលរដ្ឋខេត្តពោធិ៍សាត់ ឬជនណាម្នាក់ឡើង វាគឺជាសម្បត្តិរួមរបស់ប្រជាជនកម្ពុជាទាំងមូល ប្រសិនបើយើងទាំងអស់គ្នា មិនអាចថែរក្សាបានគឺមានមានន័យថាយើងគ្មានមាយាទ ៕