មន្ត្រីបាននិយាយនៅថ្ងៃសុក្រនេះថា ភោជនីយដ្ឋានចិន ជប៉ុន និងលោកខាងលិច នឹងត្រូវបានអនុញ្ញាតឲ្យ ជួលពលករអន្តោប្រវេសន៍ ធ្វើជាជំនួយការផ្ទះបាយ ជាវិធានការមួយដែលអាចជួយដោះស្រាយកង្វះកម្លាំងពលកម្ម នៅក្នុងឧស្សាហកម្មភោជនីយដ្ឋាន។

មន្ត្រីទាំងនោះ បាននិយាយថា នៅក្រោមគោលការណ៍អនុញ្ញាតការងារ ដែលបានធ្វើបច្ចុប្បន្នភាព ភោជនីយដ្ឋាន ដែលបម្រើម្ហូបចិន ជប៉ុន ប្រទេសលោកខាងលិច ឬម្ហូបបរទេសផ្សេងទៀត នឹងត្រូវបានអនុញ្ញាតឲ្យជួលពលករអន្តោប្រវេសន៍មកពីប្រទេសដូចជាប្រទេសចិន អាស៊ីអាគ្នេយ៍ ឬប្រជាជាតិអាស៊ី   កណ្តាល។

ក្រសួងការងារ បាននិយាយថា ពលករអន្តោប្រវេសន៍ អាចធ្វើការតែនៅក្នុងផ្ទះបាយជាជំនួយការ ខណៈដែលតួនាទីជាអ្នករត់តុ ត្រូវបានហាមឃាត់។

ក្រសួង បានបញ្ជាក់ថា ហាងនំប៉័ង ហាងកាហ្វេ ឬភោជនីយដ្ឋានដែលបម្រើភីហ្សា ហាំប៊ឺហ្គឺ មាន់បំពង និង    ហ្គីមបាប (Gimbap) ឬបាយលាយសារ៉ាយ មិនត្រូវបានរាប់បញ្ចូលក្នុងការធ្វើបច្ចុប្បន្នភាពនោះទេ ដោយសារ ពួកគេ មានតម្រូវការតិចតួចសម្រាប់ជំនួយការផ្ទះបាយ។