ក្រសួងការងារ និងបណ្តុះបណ្តាលវិជ្ជាជីវៈ បានបើកវគ្គបណ្តុះបណ្តាលជំនាញទន់ស្តីអំពី «ការ​ទំនាក់​ទំនង ការដោះស្រាយបញ្ហា និងការបំពេញការងារជាក្រុម» ដល់មន្រ្តីក្រុមការងារឆ្លើយតប និង​ផ្តល់ព័ត៌មានពាក់ព័ន្ធ ដើម្បីផ្តល់សេវាសាធារណៈ (Call Centre) នៃក្រសួងការងារ និង​បណ្តុះបណ្តាលវិជ្ជាជីវៈ។

ការ​បណ្តុះបណ្តាលនេះ ធ្វើឡើងនៅអគារទីស្នាក់ការបេឡាជាតិសន្តិសុខសង្គម (ប.ស.ស.) កាល​ពីថ្ងៃទី១៩ ខែកក្កដា (ក្រុមទី១) និងនៅថ្ងៃទី២៥ ខែកក្កដា ឆ្នាំ២០២៤ (ក្រុមទី២) ក្រោម​អធិបតីភាព ឯកឧត្តម កត្តា អ៊ន រដ្ឋលេខាធិការ និងជាប្រធានក្រុមការងារឆ្លើយតប និង​ផ្តល់​ព័ត៌មាន​ពាក់ព័ន្ធនឹងសេវាសាធារណៈនៃក្រសួងការងារ និងបណ្តុះបណ្តាលវិជ្ជាជីវៈ និងឯកឧត្តម​បណ្ឌិត ហេង សុផាន់ណារិទ្ធ អគ្គនាយករង ប.ស.ស. និងជាអនុប្រធានក្រុមការងារឆ្លើយតប និង​ផ្តល់ព័ត៌មានពាក់ព័ន្ធនឹងសេវាសាធារណៈ។ 

បើតាម ឯកឧត្តម កត្តា អ៊ន ការរៀបចំវគ្គបណ្តុះបណ្តាលនេះ ក្នុង​គោល​បំណង​ដើម្បី​បង្កើន​សមត្ថភាព​ដល់​មន្រ្ដី Call Center ក្នុងការផ្តល់សេវាសាធារណៈជូនសាធារណជន បានសកម្ម និង​មា​នប្រសិទ្ធភាពក្នុងការឆ្លើយតបមតិយោបល់ សំណួរ និង​បញ្ហា​របស់​សាធារណ​ជន​បាន​ទាន់​ពេលវេលា និងឆាប់រហ័ស។ លើសពីនេះ ក្រុមការងារត្រូវអនុវត្តភារកិច្ចប្រកបដោយក្រមសីលធម៌ វិជ្ជាជីវៈ និងមានកិច្ចសហការយ៉ាងល្អជាមួយអង្គភាពពាក់ព័ន្ធ ដើម្បីឆ្លើយតបបញ្ហា សំណូមពរ និង​សំណួររបស់ប្រជាពលរដ្ឋប្រកបដោយប្រសិទ្ធភាព។

ឯកឧត្តមបញ្ជាក់បន្ថែមថា ក្រុមការងាររង់ចាំទទួលការហៅទូរស័ព្ទចូលរបស់សាធារណជន ២៤​ម៉ោង​លើ​២៤ម៉ោង និង ៧ថ្ងៃក្នុងមួយសប្តាហ៍ តាមរយៈប្រព័ន្ធទូរសព្ទ Hotline ទាំងពីរខ្សែគឺ ១២៨៦ និង១២៩៧ ដែលរួមមាន លើសេវាបញ្ជិកានិងភាគទានបេឡាជាតិសន្តិសុខសង្គម (ប.ស.ស), សេវាពាក់ព័ន្ធវិស័យការងារ, កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស (TVET ១,៥លាននាក់) , វិវាទការងារ , មុខរបរ និងការងារ (NEA), តាវកាលិក ប.ស.ស , សេវាមូលដ្ឋានសុខាភិបាលដៃគូ ប.ស.ស, ប្រាក់ឧត្ថម្ភរាជរដ្ឋាភិបាល រួមនិងសេវា​ផ្សេង​ៗ​ទៀត​របស់​ក្រសួង។

ជាមួយនេះ ឯកឧត្តម កត្តា អ៊ន បានអំពាវនាវដល់សាធារណជន ក្នុងករណីមានចម្ងល់ ឬ​តម្រូវ​ការ​អ្វី​មួយ សូមធ្វើការទាក់ទងមកកាន់ក្រុមការងារ ដែលនេះជាកិច្ចសហការរវាងក្រុមការងារ និង​សាធារណជន ក្នុងកិច្ចការបម្រើសេវាសាធារណៈ។ លើសពីនេះទៀត ឯកឧត្តម ក៏បាន​លើក​ទឹក​ចិត្ត​ដល់​មន្ត្រី បុគ្គលិកនៃក្រុមការងារ បន្តអនុវត្តតួនាទី​ភារកិច្ច​របស់​ខ្លួន​ធ្វើ​យ៉ាង​ណា​បម្រើ​សេវា​សាធារណៈ​ជូនដល់ប្រជាពលរដ្ឋឱ្យបានរហ័ស ច្បាស់លាស់ និងពេញចិត្ត៕