លោក ដូណាល់ ត្រាំ (Donald Trump) បាននិយាយកាលពីថ្ងៃសៅរ៍ (២០ កក្កដា) ថា ពុំមាននរណាម្នាក់បានព្រមានលោកអំពីបញ្ហាដែលនាំទៅដល់ការប៉ុនប៉ងធ្វើឃាត នៅក្នុងការជួបជុំយុទ្ធនាការបោះឆ្នោតរបស់អតីតប្រធានាធិបតីរូបនេះនៅរដ្ឋ ផិនស៊ីលវេនៀ (Pennsylvania) នៅពេលដែលខ្មាន់កាំភ្លើងបាញ់ចំត្រចៀកខាងស្ដាំរបស់លោក។

លោក Trump បានប្រាប់ទូរទស្សន៍ ហ្វកញូវស៍ (Fox News) នៅក្នុងបទសម្ភាសន៍មួយថា «គ្មាននរណាម្នាក់លើកឡើងពីបញ្ហាអ្វីទេ គ្មាននរណាម្នាក់និយាយថាមានរឿងអ្វីឡើយ។ បើពួកគេប្រាប់ថាឱ្យខ្ញុំចាំសិនមិនឱ្យឡើងថ្លែង ខ្ញុំនឹងចាំ ប៉ុន្តែគ្មាននរណាម្នាក់និយាយអ្វីសោះ»។ លោកបន្ថែមថា៖ ខ្ញុំគិតថានោះជាកំហុសដ៏ធំ។ តើមានមនុស្សឡើងលើដំបូលនោះដោយរបៀបណា? ហើយហេតុអ្វីបានជាមិនមានអ្នករាយការណ៍ឱ្យខ្ញុំដឹង?

សារព័ត៌មាន វ៉ាស៊ីនតោន ប៉ុស្ដិ៍ (Washington Post) កាលពីថ្ងៃសៅរ៍បានរាយការណ៍ថា មន្ត្រីជាន់ខ្ពស់នៅសេវាសម្ងាត់អាមេរិក បានច្រានចោលសំណើជាច្រើនដងពីព័ត៌មានលម្អិតលើសន្តិសុខរបស់លោក Trump ក្នុងការបញ្ជូនកម្លាំងមនុស្ស និងឧបករណ៍បន្ថែមនៅក្នុងព្រឹត្តិការណ៍នានា មុនការប៉ុនប៉ងធ្វើឃាតនៅថ្ងៃទី ១៣ ខែកក្កដា។

សារព័ត៌មាននេះរាយការណ៍ដោយសម្អាងដល់ប្រភពដែលដឹងពីបញ្ហានេះថា ទីភ្នាក់ងារដែលទទួលខុសត្រូវការពារលោក Trump បានបដិសេធសំណើ ដោយនិយាយថាពេលនោះខ្លួនខ្វះធនធាន។ អ្នកនាំពាក្យសេវាសម្ងាត់លោក អង់តូនី ហ្គូលីមី (Anthony Guglielmi) ធ្លាប់បានបដិសេធការចោទប្រកាន់ដែលថាទីភ្នាក់ងារនេះបដិសេធសំណើសុំធនធានសន្តិសុខបន្ថែមពីក្រុមរបស់លោក Trump៕