អ្នកស្រុកនៅតំបន់ ហ្កាហ្សាស្រ្ទីប (Gaza Strip) បានស្វាគមន៍កិច្ចប្រជុំរវាងចលនារំដោះជាតិប៉ាឡេស្ទីន ហ្វាតា (Fatah) និងចលនាតស៊ូអ៊ីស្លាម ហាម៉ាស (Hamas) នៅទីក្រុងប៉េកាំង នៅចុងសប្តាហ៍នេះ ដោយអំពាវនាវឱ្យមានការផ្សះផ្សារ និងការឯកភាពគ្នាពិតប្រាកដក្នុងចំណោមប្រជាជនប៉ាឡេស្ទីនដូចគ្នា។

អ្នកស្រុកហ្កាហ្សាម្នាក់និយាយថា «បន្ទាប់ពី ២១ឆ្នាំនៃការបែកបាក់ និងការមើលងាយគ្នាទៅមក វាដល់ពេលហើយដែលត្រូវស្វែងរកការផ្សះផ្សារ។ យើងស្នើឱ្យចិន មិនអនុញ្ញាតឱ្យ ហ្វាតា និង ហាម៉ាស ចាកចេញឡើយ រហូតមានការផ្សះផ្សារពិតប្រាកដ»។

លោក អាមចាដ សាវ៉ា (Amjad Shawa) នាយកបណ្តាញអង្គការមិនមែនរដ្ឋាភិបាលប៉ាឡេស្ទីន (PNGO) បានសម្តែងក្តីសង្ឃឹមថា កិច្ចខិតខំប្រឹងប្រែងរបស់ចិន ក្នុងការសម្របសម្រួលកិច្ចសន្ទនារវាងក្រុមហ្វាតា និងក្រុមហាម៉ាស នឹងអាចបញ្ចប់ភាពខ្វែងគំនិតនយោបាយដ៏យូរអង្វែងដើម្បីពង្រឹងការឯកភាពគ្នា ស្របពេលមានភាពតានតឹង និងវិបត្តិមនុស្សធម៌ធ្ងន់ធ្ងរ។

ក្រុមហ្កាហ្សា គ្រប់គ្រងតំបន់ហ្កាហ្សា ខណៈក្រុមហ្វាតា គ្រប់គ្រងដោយផ្នែកនៃរដ្ឋបាលនៅតំបន់ វេសបែង (West Bank)។ ភាគីទាំងពីរបានជាប់គាំងនៅក្នុងការប្រកួតប្រជែងដ៏ជូរចត់មួយចាប់តាំងពីការបោះឆ្នោតអាជ្ញាធរប៉ាឡេស្ទីនឆ្នាំ២០០៦ មក។ កិច្ចចរចាផ្សះផ្សារនៅទីក្រុងប៉េកាំង ត្រូវបានគេមើលឃើញថាមានសារៈសំខាន់សម្រាប់ការបញ្ចប់ជម្លោះប៉ាឡេស្ទីន-អ៊ីស្រាអែល ដែលកំពុងបន្ត៕