លោកប្រធានាធិបតីកេនយ៉ា វីលៀមរ៉ូតូ (William Ruto) កាលពីថ្ងៃអាទិត្យបាននិយាយថា ការតវ៉ាដែលនៅតែបន្តក្នុងប្រទេសត្រូវតែបញ្ឈប់។

លោក Ruto បាននិយាយបន្ទាប់ពីបានចូលរួមពិធីមួយនៅព្រះវិហារក្នុងស្រុកបូម៉េត (Bomet) នៃ តំបន់ជ្រលងភ្នំ Rift Valley ចម្ងាយប្រហែល ២២៤ គីឡូម៉ែត្រ ភាគខាងលិចទីក្រុង រដ្ឋធានីណៃរ៉ូប៊ី (Nairobi) ថា ខ្ញុំចង់សន្យាចំពោះអ្នកថា ការតវ៉ានេះនឹងត្រូវឈប់ ប៉ុណ្ណឹងគ្រប់គ្រាន់ហើយ។

តទៅមុខ យើងនឹងការពារប្រទេសជាតិ យើងនឹងការពារអាយុជីវិត យើងនឹងការពារទ្រព្យសម្បត្តិ យើងនឹងបញ្ឈប់អំពើឆក់ប្លន់ បញ្ឈប់ឃាតករ បញ្ឈប់ការឃុបឃិត និងអនាធិបតេយ្យ ព្រោះកេនយ៉ាជាប្រទេសប្រជាធិបតេយ្យ ហើយយើងចង់បានប្រទេសមានសន្តិភាព និងស្ថិរភាព ព្រោះបញ្ហារបស់យើងគឺ ដោះស្រាយដោយប្រើមធ្យោបាយប្រជាធិបតេយ្យ។

លោកបាននិយាយថា រដ្ឋបាលរបស់លោកបានធ្វើសម្បទានសំខាន់ៗរួចហើយ ដើម្បីឆ្លើយតបទៅនឹងការទាមទាររបស់ក្រុមបាតុករ ដែល "គ្មានអ្នកដឹកនាំ និងគ្មានមុខ" រួមទាំងការបដិសេធច្បាប់ហិរញ្ញវត្ថុឆ្នាំ ២០២៤ និងការបណ្តេញមន្ត្រីចេញពីតំណែងស្ទើរតែទាំងអស់ពីគណៈរដ្ឋមន្ត្រី។

ទោះបីជាមានសកម្មភាពបែបនេះក៏ដោយ ក៏ការតវ៉ានៅតែបន្តមិនឈប់ឈរ។

រដ្ឋបាលលោក Ruto ស្ថិតក្រោមសម្ពាធយ៉ាងខ្លាំងជាច្រើនសប្ដាហ៍នៃការតវ៉ាក្លាយជាហិង្សា ដែលបានផ្ដាច់ជីវិតមនុស្សយ៉ាងហោចណាស់៥០នាក់ និងបង្កការបំផ្លាញបំផ្លាញធ្ងន់ធ្ងរ ព្រមទាំងទាមទារឲ្យលោកចុះចេញពីតណែង៕