នាយឧត្តមសេនីយ៍ មាស វិរិទ្ធ អគ្គលេខា នៃអគ្គលេខាធិការ​រដ្ឋាន​អាជ្ញាធរជាតិ​ប្រយុទ្ធ​ប្រឆាំង​គ្រឿង​ញៀនបានថ្លែងថា និន្នាការបញ្ហាគ្រឿងញៀន នៅលើពិភពលោក​មិនមាន​ការ​ថមថយ​នោះ​ទេ ដោយឧក្រិដ្ឋជន មានលទ្ធភាពផលិតគ្រឿនញៀនច្រើនបែបជាងមុន ខណៈកម្ពុជា​បាននិង​កំពុងដាក់​ចេញ​នូវយន្តការជាច្រើនចំណុច ដើម្បីទប់ស្កាត់ទប់ទល់បញ្ហានេះ ។

ក្នុងវេទិកាពិភាក្សាក្រោមប្រធានបទ “គោលនយោបាយ និងយុទ្ធសាស្ត្រ​ក្នុង​ការ​ប្រយុទ្ធ​ប្រឆាំង​គ្រឿង​ញៀន​ខុសច្បាប់” រៀបចំដោយក្លឹបអ្នកកាសែតកម្ពុជា នៅថ្ងៃទី២២ ខែកក្កដា ឆ្នាំ២០២៤ នាយឧត្តមសេនីយ៍ មាស វិរិទ្ធ មានប្រសាសន៍ថា នាពេលបច្ចុប្បន្ន ការផលិតគ្រឿងញៀន​របស់​ឧក្រិដ្ឋជន មានជាលក្ខណៈពាក់កណ្ដាលសំយោគ និងធ្វើសំយោគ គឺមានន័យថា ការផលិត​យកសា​រធាតុគីមីលាយផ្សំគ្នា មិនចាំបាច់យករុក្ខជាតិមានជាតិញៀន មកផលិតដូចមុននោះទេ ។

ឯកឧត្តមបានបន្តថា ចំពោះការផលិតនេះ ឧក្រិដ្ឋជន បានផលិតនៅទីកន្លែងអាថ៍កំបាំង ក្នុង​ព្រៃក្រាសៗ ជាពិសេសនៅក្នុងតំបន់ត្រីកោណមាស ដែលគ្មាន​រដ្ឋបាល​ប្រទេសណា​មួយ​គ្រប់​គ្រង​បាន​ត្រឹមត្រូវ ពិបាកក្នុងការបាញ់ផ្កាយរណបតាមដាន ឬមើលឃើញ ព្រោះជនល្មើស​បាន​ផលិត​នៅ​ក្នុង​ផ្ទះ ឬទីតាំងបិទជិត ។

នាយឧត្តមសេនីយ៍ មាស វិរិទ្ធ គូសបញ្ជាក់ថា ទន្ទឹមនឹងនិន្នាការមិនមានថមថយ នៃបទ​ល្មើស​គ្រឿង​ញៀន​នេះ ជាពិសេសចេញពីតំបន់ត្រីកោណនោះ រាជរដ្ឋាភិបាលកម្ពុជា បានដាក់កម្លាំង​នៅ​តាម​ច្រក​ព្រំដែន ដែលតែងតែមាននូវឧក្រិដ្ឋជនដឹកឆ្លងកាត់ចូលប្រទេសកម្ពុជា ទៅកាន់​ប្រទេស​ទី៣​ រួមទាំងបានដាក់ចេញយុទ្ធសាស្ត្រថ្នាក់ជាតិចំនួន ៦ចំណុច ជាមួយ​នឹង​វិធានការ​យុទ្ធសាស្ត្រ​ចំនួន ៨ចំណុច ។

ឯកឧត្តម បានបន្តទៀតថា យុទ្ធសាស្ត្រថ្នាក់ជាតិទាំង ៦ចំណុច ដាក់ចេញ​ដោយ​អាជ្ញាធរជាតិ​ប្រយុទ្ធ​ប្រឆាំង​គ្រឿងញៀន ទី១. កាត់បន្ថយតម្រូវការគ្រឿងញៀន, ទី២. កាត់បន្ថយការ​ជួញ​ដូរ​គ្រឿង​ញៀន​, ទី៣. ការពង្រឹងប្រសិទ្ធភាពព្យាបាល ស្ដារនីតិសម្បទា និងធ្វើសមាហរណកម្ម, ទី៤. ការ​ពង្រឹងប្រសិទ្ធភាពការអនុវត្តច្បាប់, ទី៥. ការពង្រឹងពង្រីកកិច្ចសហប្រតិបត្តិការអន្តរជាតិ និង​ទី៦. ការពង្រឹងយន្តការពហុវិស័យនៅថ្នាក់ក្រោមជាតិ ។

ចំពោះវិធានការយុទ្ធសាស្ត្រចំនួន ៨ចំណុច រួមមានទី១. ការពង្រឹង​ការ​ត្រួត​ពិនិត្យ​គ្រឿងញៀន​នៅ​ថ្នាក់​ជាតិ និងក្រោមជាតិ, ទី២. ការផ្សព្វផ្សាយក្នុងការទប់ស្កាត់ និងបដិសេធចំពោះគ្រឿងញៀន, ទី៣. ការព្យាបាល ស្ដារនីតិសម្បទា បណ្ដុះបណ្ដាលវិជ្ជាជីវៈ សមាហរណកម្ម​ការ​ចាក​ចេញ​ពី​គ្រឿង​ញៀន, ទី៤. ការពង្រឹងស្ថាប័នអនុវត្តច្បាប់, ទី៥. ពង្រឹងប្រសិទ្ធភាព​ការ​ត្រួត​ពិនិត្យ​គ្រឿង​ផ្សំ, ទី៦. ពង្រឹងកិច្ចសហប្រតិបត្តិការអន្តរជាតិ ជាមួយប្រទេសជាប់ព្រំដែន, ទី៧. ធ្វើកិច្ច​សហ​ប្រតិបត្តិ​ការ​អន្តរជាតិ ជាមួយប្រទេសក្នុងតំបន់ និងដៃគូអភិវឌ្ឍនានា និងទី៨. គឺការ​អនុវត្ត​លេខ​០១ របស់រាជរដ្ឋាភិបាល ស្តីពីការដាក់ចេញវិធានការម៉ឺងម៉ាត់ ក្នុងការ​ប្រយុទ្ធ​ប្រឆាំង​គ្រឿង​ញៀន​ខុស​ច្បាប់ នៅតាមក្រសួងស្ថាប័ន និងរដ្ឋបាលថ្នាក់ក្រោមជាតិ៕ អត្ថបទ បាន សុខរិទ្ធិ