​វាយ​កូន​បាល់៖ ​កីឡាករ​វាយ​កូន​បាល់​ស្កុ​ត​ឡេ​ន Andy Murray បាន​បង្ហាញ​ពី​សកម្មភាព​ប្រកួត​រឹងមាំ​មកវិញ​ បន្ទាប់ពី​សម្រាក​ព្យាបាល​របួស​ញាំញី ទោះបីជា​ចាញ់​កីឡាករ​ក្រិ​ក Stefanos Tsitsipas នៅ​ជុំ​ដំបូង Grand Slam, US Open ក៏ដោយ​។

​​អតីត​កីឡាករ​លំដាប់​លេខ ១ ពិភពលោក និង​ជា​អតីត​ជើងឯក Grand Slam, US Open នេះ​បាន​នាំមុខ​លើ Tsitsipas ២សិត​ទល់នឹង១ មុន​ពេលដែល​កីឡាករ​ក្រិ​ក​វាយបក​យកឈ្នះ​វិញ​ ២​សិត​ចុងក្រោយ​សរុប​ជា​លទ្ធផល ២-៦, ៧-៦(៩-៧), ៣-៦, ៦-៣ និង ៦-៤​។ ​បច្ចុប្បន្ន​ឈរ​លំដាប់ថ្នាក់​លេខ ១១២ ពិភពលោក Andy Murray កំពុង​ស្វែងរក​ជ័យជំនះ​ដំបូង​ក្នុង​ការប្រកួត​ព្រឹត្តិការណ៍​សំខាន់ៗ បន្ទាប់ពី​របួស​ត្រកៀក​ញាំញី​ជាច្រើន​ឆ្នាំ​ ដែល​ស្ទើ​តែ​ធ្វើ​ឱ្យគេ​បង្ខំចិត្ត​ចូលនិវត្តន៍​ទៅហើយ​។ ​​ងាក​មក​ការប្រកួត​គូ​ផ្សេងទៀត កីឡាករ​រុស្ស៊ី Ruben Rublev បាន​ឈានចូល​ជុំ​ទី២ ក្រោយ​យកឈ្នះ​កីឡាករ​ក្រូ​អាស៊ី Ivo Karlovic ៣​សិត​ផ្ទួនៗ ៦-៣, ៧-៦(៧-៣) និង ៦-៣​។ ​កីឡាករ​លំដាប់​ទី៥ Ruben Rublev នឹង​បន្ត​ជួប​ជាមួយកីឡាករ Pedro Martinez រឺ James Duckworth នៅ​ជុំ​បន្ត​។

​​ចំណែក​ការប្រកួត​ផ្នែក​នារី​វិញ កីឡាការិនី​វ័យ ៣២ឆ្នាំ Carla Suarez Navarro បាន​ធ្លាក់​ត្រឹម​ជុំ​ដំបូង​ក្រោយ​ចាញ់​កីឡាការិនី Danielle Collins ស្របពេល​កីឡាការិនី​អាមេរិក Cori Gauff ឈានចូល​ជុំ​បន្ត​ក្រោយ​យកឈ្នះ​កីឡាការិនី​ប៉ូឡូញ Magda Linette​។ ​រីឯ​អតីត​ជើងឯក US Open នេះ​បី​សម័យ Victoria Azarenka ក៏បាន​ឈានចូល​ជុំ​បន្ត​ផងដែរ​ក្រោយ​យកឈ្នះ​កីឡាការិនី Tereza Martincova​។ ​​កីឡាការិនី​បេឡា​រុស Azarenka ដែល​ចាញ់ Naomi Osaka នៅ​វគ្គ​ផ្តាច់ព្រ័ត្រ​ឆ្នាំមុននឹង​បន្តទៅ​ជុំ​ទី២ ជួប​ជាមួយកីឡាការិនី Jasmine Paolini រឺ Yaroslava Shvedova៕

​អត្ថបទ​៖​នាង សុភា​វុ​ធ