សារព័ត៌មានរុស្ស៊ី រាយការណ៍នៅថ្ងៃអង្គារនេះថា កងកម្លាំងរុស្ស៊ី បានធ្វើសមយុទ្ធយោធា ពាក់ព័ន្ធនឹងការដាក់ពង្រាយជើងទម្រមីស៊ីលនុយក្លេអ៊ែរចល័ត ដែលជាសមយុទ្ធបែបនេះជាលើកទី ២ ក្នុងរយៈពេលតិចជាង ១ខែ ។

សមយុទ្ធយោធានេះដែរ បានធ្វើឡើង បន្ទាប់ពីមានសមយុទ្ធយោធាស្រដៀងគ្នាកាលពីដើមខែកក្កដា នៅតាមតំបន់យ៉ាងហោច ២កន្លែង និងធ្វើឡើងរយៈពេលតិចជាង ២ខែ ក្រោយរុស្ស៊ី បានធ្វើសមយុទ្ធដាក់ពង្រាយអាវុធនុយក្លេអ៊ែរតាក់ទិក ជាមួយប្រទេសសម្ព័ន្ធមិត្តបេឡារុស ។

កាសែត Kommersant របស់រុស្ស៊ី រាយការណ៍ថា ប្រព័ន្ធនេះបំពាក់ដោយមីស៊ីលមានក្បាលគ្រាប់នុយក្លេអ៊ែរច្រើន អាចវាយប្រហារគោលដៅនៅចម្ងាយ ១១.០០០គ.ម ។

ពួកគេរាយការណ៍ផងដែរថា ប្រព័ន្ធនេះ អាចដំឡើងនៅលើរថយន្ត ឬដាក់ពង្រាយដាច់តែឯង ។

ចាប់តាំងពីការវាយប្រហារអ៊ុយក្រែនកាលពីខែកុម្ភៈ ឆ្នាំ ២០២២មក រុស្ស៊ី បានធ្វើសមយុទ្ធយោធាជាច្រើនលើកនៅលើទឹកដីរបស់ខ្លួន ឬនៅលើប្រទេសផ្សេងទៀត រួមទាំងនៅប្រទេសចិន ឬនៅអាហ្វ្រិកខាងត្បូង ។

ពួកគេបានបង្កើនផងដែរសមយុទ្ធយោធាជាមួយប្រទេសបេឡារុស ដែលជាប់ព្រំដែនជាមួយរុស្ស៊ី និងអ៊ុយក្រែន ៕