រដ្ឋាភិបាលចិន នៅថ្ងៃពុធ (ទី២៤ ខែកក្កដា) បានប្រាប់ថា បុគ្គលិកអ្នកកោះតៃវ៉ាន់ នៅក្រុមហ៊ុនពហុជាតិ ក្នុងប្រទេសចិន មិនមានអ្វីត្រូវភ័យខ្លាចនោះទេ ដរាបណាពួកគេមិនបំពានច្បាប់ ដោយធ្វើតាមការណែនាំពីច្បាប់ថ្មីដែលកំណត់ទោសប្រហារជីវិត នៅក្នុងករណីធ្ងន់ធ្ងរ សម្រាប់ពួកបំបែកខ្លួន «រឹងត្អឹង»។

គួរបញ្ជាក់ថា ប្រទេសចិន ដែលចាត់ទុកកោះតៃវ៉ាន់ថា ជាដែនដីរបស់ខ្លួន បានចេញគោលការណ៍ណែនាំថ្មី បន្ទាប់ពីមេដឹកនាំ លោក Lai Ching-te បានឡើងកាន់តំណែង កាលពីខែឧសភា ដែលទីក្រុងប៉េកាំងមិនបានលាក់បាំងពីការដែលខ្លួនមិនពេញចិត្តនឹងមេដឹកនាំថ្មីនេះ និងបានហៅលោកថា ជា «អ្នកបំបែកខ្លួន»។

ក្រោយមានការចេញគោលការណ៍ណែនាំនោះ ប្រភពបានប្រាប់សារព័ត៌មាន Reuters ថា ក្រុមហ៊ុនបរទេសមួយចំនួន កំពុងពិចារណាផ្លាស់បុគ្គលិកអ្នកកោះតៃវ៉ាន់ចេញពីប្រទេសចិន។

តែយ៉ាងណាក្ដី ដោយនិយាយនៅឯសន្និសីទសារព័ត៌មានប្រចាំថ្ងៃ លោកស្រី Zhu Fenglian អ្នកនាំពាក្យការិយាល័យកិច្ចការកោះតៃវ៉ាន់របស់ប្រទេសចិន បានរំលឹកឡើងវិញថា មិនមានហេតុផល ក្នុងការព្រមានដល់អ្នករស់នៅកោះតៃវ៉ាន់ភាគច្រើននោះទេ។

អ្នកស្រីបាននិយាយថា៖ «ជនរួមជាតិអ្នកកោះតៃវ៉ាន់ភាគច្រើន ក្នុងនោះរួមទាំងបុគ្គលិកតៃវ៉ាន់ ដែលធ្វើការនៅក្នុងក្រុមហ៊ុនពហុជាតិ អាចមានអារម្មណ៍សុខស្រួលធម្មតា ក្នុងការរស់នៅក្នុងចិនដីគោក ដរាបណាពួកគេមិនចូលរួមក្នុងអំពើឧក្រិដ្ឋកម្មណាមួយ»។

រដ្ឋបាលកោះតៃវ៉ាន់ បានបង្កើនការព្រមានអំពីការធ្វើដំណើររបស់អ្នកកោះតៃវ៉ាន់ទៅប្រទេសចិន បន្ទាប់ពីការណែនាំត្រូវបានដាក់ចេញ ដោយលើកឡើងថា ពលរដ្ឋគួរតែទៅទីនោះ ប្រសិនបើចាំបាច់ខ្លាំង ដែលការប្រកាសបែបនេះបានបង្កឲ្យមានកំហឹងពីទីក្រុងប៉េកាំង៕