សេចក្តីព្រាងឯកសារមួយរបស់សហភាពអឺរ៉ុប (EU) បានបង្ហាញថា បណ្តាប្រទេសសមាជិករបស់ប្លុកនេះ នឹងពិភាក្សាគ្នាអំពីជម្រើស ក្នុងការពង្រីកបន្ថែមនូវការដាក់ទណ្ឌកម្មលើទ្រព្យសម្បត្តិរបស់ធនាគារកណ្តាលរុស្ស៊ី ដើម្បីជួយធានាដល់ការផ្ដល់ប្រាក់កម្ចីរបស់ប្រទេសមានឧស្សាហកម្មលូតលាស់ទាំង៧ (G7) សម្រាប់ប្រទេសអ៊ុយក្រែន។

បណ្ដាមេដឹកនាំប្រទេស G7 និង EU បានព្រមព្រៀងគ្នា កាលពីខែមិថុនា ក្នុងការប្រើប្រាស់ការប្រាក់ពីទ្រព្យសម្បត្តិរបស់រុស្ស៊ីដែលត្រូវបានផ្អឹបទុក ដើម្បីជួយគាំទ្រដល់ប្រាក់កម្ចីចំនួន ៥០ពាន់លានដុល្លារ សម្រាប់អ៊ុយក្រែន។ គួរបញ្ជាក់ថា ភាគច្រើននៃទ្រព្យសម្បត្តិ ៣០០ពាន់លានដុល្លារ ត្រូវបានកាន់កាប់នៅក្នុងស្ថាប័នហិរញ្ញវត្ថុរបស់ EU ជាពិសេសនៅក្នុងប្រទេសបែលហ្ស៊ិក។

ការដាក់ទណ្ឌកម្មទាមទារឲ្យមានការយល់ព្រមជាឯកច្ឆន្ទពីប្រទេសសមាជិក EU រៀងរាល់ ៦ខែម្តង។ មានការព្រួយបារម្ភកាន់តែខ្លាំងឡើងថា ការស្រុះស្រួលគ្នាតែមួយនេះ មិនអាចបន្តរក្សាឲ្យគង់វង្សបាននោះឡើយ ដែលបង្កជាហានិភ័យដល់ប្រាក់កម្ចី។ នាយករដ្ឋមន្ត្រីហុងគ្រី លោក Viktor Orban ដោយមានទំនាក់ទំនងជិតស្និទ្ធជាមួយរុស្ស៊ី ជារឿយៗ បានពន្យារពេលការដាក់ទណ្ឌកម្មថ្មី និងការគាំទ្រសម្រាប់អ៊ុយក្រែន។

ឯកអគ្គរដ្ឋទូតសហភាពអឺរ៉ុបនឹងពិចារណាជម្រើស២ នោះគឺការពង្រីកបន្ថែមទណ្ឌកម្មបើកចំហដែលត្រូវបានពិនិត្យរៀងរាល់ ១២ខែម្តង ឬរយៈពេលត្រួតពិនិត្យមានរហូតដល់ ៣ឆ្នាំ។

ជម្រើសទាំង២ នេះ ទាមទារនូវកិច្ចព្រមព្រៀងសហភាពអឺរ៉ុបជាឯកច្ឆន្ទ និងអនុវត្តតែចំពោះទ្រព្យសកម្មរបស់ធនាគារកណ្តាលរុស្ស៊ីប៉ុណ្ណោះ ក្នុងគោលបំណងធានាឲ្យមានភាពច្បាស់លាស់ និងភាពប្រាកដប្រជាផ្នែកច្បាប់ សម្រាប់ដៃគូ G7 ដែលគាំទ្រអ៊ុយក្រែន៕