សហរដ្ឋអាមេរិក បានរំលឹកឡើងវិញពីការព្រួយបារម្ភរបស់ខ្លួនកាលពីថ្ងៃពុធ ជុំវិញការកើនឡើងនៃកិច្ចសហប្រតិបត្តិការយោធារវាងកូរ៉េខាងជើង និងរុស្ស៊ី បន្ទាប់ពីអនុរដ្ឋមន្ត្រីការពារជាតិរបស់រុស្ស៊ី បានទៅបំពេញទស្សនកិច្ច នៅក្រុងព្យុងយ៉ាងកាលពីសប្តាហ៍មុន ដែលជាសញ្ញានៃការពង្រឹងទំនាក់ទំនងទ្វេភាគី។

លោក Matthew Miller អ្នកនាំពាក្យក្រសួងការបរទេស បានធ្វើការអត្ថាធិប្បាយ ប៉ុន្មានម៉ោងបន្ទាប់ពីក្រសួងរតនាគារ បានចេញទណ្ឌកម្មលើបុគ្គលចំនួន ៦រូប និងអង្គភាពចំនួន ៥ ដែលត្រូវបានចោទប្រកាន់ថា បានជាប់ពាក់ព័ន្ធក្នុងការទិញទំនិញដែលគាំទ្រដល់កម្មវិធីមីស៊ីលបាលីស្ទីកនិងអវកាសរបស់កូរ៉េខាង ជើង។

លោកបាននិយាយក្នុងអំឡុងសន្និសីទសារព័ត៌មានមួយថា៖ «ដូចដែលអ្នកបានដឹងហើយថា យើងមានការព្រួយបារម្ភយ៉ាងខ្លាំងអំពីការធ្វើឲ្យកិច្ចសហប្រតិបត្តិការសន្តិសុខរវាងរុស្ស៊ីនិងកូរ៉េខាងជើង កាន់តែស៊ីជម្រៅនោះ។

លោកបានបន្ថែមថា៖«ប្រសិនបើយើង បានឃើញអាវុធហូរចេញពីប្រទេសកូរ៉េខាងជើង ទៅកាន់ប្រទេសណាមួយ ឬពីប្រទេសណាមួយទៅកាន់ប្រទេសកូរ៉េខាងជើង នោះគឺជាអ្វីមួយ ដែលយើងក៏នឹងព្រួយបារម្ភដូចគ្នាដែរ»។

កាលពីសប្តាហ៍មុន មេដឹកនាំកូរ៉េខាងជើង លោក គីម ជុងអ៊ុន បានពិភាក្សាអំពី«សារៈសំខាន់ និងភាពចាំបាច់»នៃកិច្ចសហប្រតិបត្តិការយោធារវាងទីក្រុងព្យុងយ៉ាង និងទីក្រុងមូស្គូ នៅពេលដែល លោក បានជួបជាមួយអនុរដ្ឋមន្ត្រីការពារជាតិរុស្ស៊ី លោក Aleksey Krivoruchko។