ប្រតិបត្តិកររថភ្លើង SNCF បាននិយាយថា បណ្តាញផ្លូវដែកល្បឿនលឿនរបស់ប្រទេសបារាំង បានរងការវាយប្រហារដោយឲ្យអគិ្គភ័យឆេះ «គួរឲ្យស្អប់ខ្ពើម» ដែលបានរំខានដល់ប្រព័ន្ធដឹកជញ្ជូនជាច្រើនម៉ោង មុនពេលពិធីបើកកីឡាអូឡាំពិក នៅទីក្រុងប៉ារីស។ 

SNCF បានប្រាប់សារព័ត៌មាន AFP ថា៖«នេះ គឺជាការវាយប្រហារក្នុងទ្រង់ទ្រាយធំមួយ ដើម្បីធ្វើឲ្យ      បណ្តាញរថភ្លើង TGV គាំងដំណើរការ»។

ប្រតិបត្តិករនេះ បាននិយាយថា ជើងរថភ្លើងជាច្រើន នឹងត្រូវលុបចោល ហើយស្ថានភាពនេះ នឹងមានរយៈពេល«យ៉ាងហោចណាស់ពេញមួយចុងសប្តាហ៍នេះ ខណៈពេលដែលការជួសជុល កំពុងត្រូវបានធ្វើឡើងនោះ»។

ប្រតិបត្តិកររថភ្លើងជាតិ បាននិយាយថា៖«SNCF គឺជាជនរងគ្រោះនៃអំពើគួរឲ្យស្អប់ខ្ពើមជាច្រើន ក្នុងពេលដំណាលគ្នា ក្នុងពេលតែមួយយប់នោះ»។

ឧបទ្ទវហេតុនេះ ត្រូវបានគេព្យាករថា នឹងប៉ះពាល់ដល់អ្នកដំណើរប្រមាណ ៨០០.000នាក់។

ការវាយប្រហារ នឹងប៉ះពាល់ដល់ខ្សែរថយន្តភ្លើងជាច្រើននៅអាត្លង់ទិកភាគខាងជើង និងភាគខាងកើត។

ប្រតិបត្តិកររថភ្លើងជាតិ បានបន្ថែមថា៖«ការវាយប្រហារដោយបង្កឲ្យអគ្គិភ័យឆេះនេះ បានធ្វើឲ្យខូចខាតសម្ភារៈបរិក្ខាររបស់យើង»។