ចិន៖ មន្ត្រីការទូតជាន់ខ្ពស់ចិន លោក Wang Yi បានព្រមានសហរដ្ឋអាមេរិកថា ភាពតានតឹងផ្នែកនយោបាយរវាងទីក្រុងប៉េកាំង និងវ៉ាស៊ីនតោនអាចធ្វើឱ្យប៉ះពាល់ដល់កិច្ចខិតខំប្រឹងប្រែង របស់ប្រភពឧស្ម័នផ្ទះកញ្ចក់សំខាន់ចំនួនពីររបស់ពិភពលោក ក្នុងសហប្រតិបត្តិការប្រយុទ្ធប្រឆាំងនឹងការប្រែប្រួលអាកាសធាតុ។
យោងតាមសេចក្ដីថ្លែងការណ៍ចេញផ្សាយដោយក្រសួងការបរទេសកាលពីល្ងាចថ្ងៃពុធ ទីប្រឹក្សារដ្ឋ និងជារដ្ឋមន្ត្រីការបរទេសចិន បានប្រាប់ប្រេសិតទទួលបន្ទុកបញ្ហាអាកាសធាតុអាមេរិកលោក John Kerry តាមរយៈវីដេអូកាលពីថ្ងៃពុធថា កិច្ចខិតខំប្រឹងប្រែងរួមគ្នារបស់ភាគីទាំង២ ក្នុងការប្រយុទ្ធប្រឆាំងនឹងការឡើងកំដៅលើភពផែនដីគឺជា “អូអាស៊ីស”។ ក្រសួងការបរទេសអាមេរិកបាននិយាយថា លោក Kerry ដែលស្ថិតនៅទីក្រុងធានជីន ប្រទេសចិន សម្រាប់កិច្ចពិភាក្សាអំពីអាកាសធាតុជាមួយក្រុមមន្ត្រីចិនបាននិយាយថា សហរដ្ឋអាមេរិកប្តេជ្ញាសហការជាមួយប្រទេសដទៃទៀត លើពិភពលោកស្តីពីការប្រែប្រួលអាកាសធាតុ និងលើកទឹកចិត្តចិនឱ្យចាត់វិធានការបន្ថែមដើម្បីកាត់បន្ថយការបំភាយឧស្ម័ន។
ប្រទេសចិនគឺជាអ្នកបញ្ចេញកាបូនច្រើនបំផុតរបស់ពិភពលោក។ លោក Kerry អតីតរដ្ឋមន្ត្រីការបរទេសអាមេរិករូបនេះបាននិយាយផងដែរថា ប្រទេសចិន “ដើរតួយ៉ាងសំខាន់បំផុត” ក្នុងកិច្ចប្រឹងប្រែងដើម្បីប្រយុទ្ធប្រឆាំងនឹងការប្រែប្រួលអាកាសធាតុ នេះបើយោងតាមវីដេអូឃ្លីបខ្លីមួយពីកិច្ចប្រជុំ ដែលបានបង្ហាញនៅលើកញ្ចក់ទូរទស្សន៍ចិន CGTN ដែលជាបុត្រសម្ព័ន្ធអន្តរជាតិនៃទូរទស្សន៍រដ្ឋ CCTV៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
