ប្រធានាធិបតី លោក Tayyip Erdogan បាននិយាយកាលពីថ្ងៃអាទិត្យថា ប្រទេសទួរគី អាចចូលទៅក្នុងជម្លោះរបស់អ៊ីស្រាអែល ដូចដែលខ្លួនបានធ្វើកាលពីពេលមុននៅក្នុងប្រទេសលីប៊ី និងតំបន់ Nagorno-Karabakh ទោះបីជាលោក ពុំបានគូសបញ្ជាក់ថាតើការធ្វើអន្តរាគមន៍បែបណា ដែលលោកនឹងធ្វើ។

លោក Erdogan ធ្លាប់ជាអ្នករិះគន់យ៉ាងខ្លាំងក្លា ចំពោះការវាយលុករបស់អ៊ីស្រាអែល នៅតំបន់ហ្កាហ្សា បានចាប់ផ្តើមពិភាក្សាអំពីសង្គ្រាមនោះ អំឡុងពេលសុន្ទរកថា ដោយលើកសរសើរពីឧស្សាហកម្មការពារជាតិរបស់ប្រទេសលោក។

លោក Erdogan បាននិយាយទៅកាន់កិច្ចប្រជុំរបស់គណបក្ស AK ដែលកំពុងកាន់អំណាចរបស់លោកថា «យើងត្រូវតែរឹងមាំខ្លាំង ដូច្នេះអ៊ីស្រាអែលពុំអាចធ្វើនូវរឿងគួរឱ្យអស់សំណើចទាំងនេះ ចំពោះប៉ាឡេស្ទីនបានឡើយ។

ដូចដែលយើង ចូលទៅក្នុងបញ្ហានៅតំបន់ Karabakh ប្រទេសអាស៊ែបៃហ្សង់ ដូចដែលយើងចូលទៅក្នុងបញ្ហានៅក្នុងប្រទេសលីប៊ី ដែលយើងអាចធ្វើស្រដៀងគ្នានេះ។

លោកប្រធានាធិបតី ទំនងជាចង់និយាយសំដៅទៅលើសកម្មភាពកាលពីពេលកន្លងមករបស់ប្រទេសទួរគី។ នៅឆ្នាំ២០២០ ប្រទេសទួរគី បានបញ្ជូនបុគ្គលិកយោធាទៅកាន់ប្រទេសលីប៊ី ដើម្បីគាំទ្រដល់រដ្ឋាភិបាលដែលទទួលស្គាល់ដោយអង្គការសហប្រជាជាតិ នៃកិច្ចព្រមព្រៀងជាតិរបស់ប្រទេសលីប៊ី។

ទួរគី បានបដិសេធរាល់តួនាទីផ្ទាល់ណាមួយ នៅក្នុងប្រតិបត្តិការយោធារបស់ប្រទេសអាស៊ែបៃហ្សង់ នៅក្នុងតំបន់ Nagorno-Karabakh ប៉ុន្តែបាននិយាយថា កាលពីឆ្នាំមុន ខ្លួនបានប្រើប្រាស់ «គ្រប់មធ្យោបាយ» រួមមានទាំងការបណ្តុះបណ្តាលយោធា និងការធ្វើទំនើបកម្មដើម្បីគាំទ្រសម្ព័ន្ធមិត្តជិតស្និទ្ធរបស់ខ្លួន។