នគរបាលឥណ្ឌា នៅថ្ងៃចន្ទ (២៩ កក្កដា) នេះ បានប្រាប់ឲ្យដឹងថា មនុស្សចំនួន ៧នាក់ត្រូវបានចាប់ខ្លួន ពាក់ព័ន្ធនឹងឧបទ្ទវហេតុលង់ទឹកស្លាប់របស់សិស្ស ៣នាក់ នៅក្នុងទីក្រុងញូវដេលី (New Delhi)។

គួរបញ្ជាក់ថា ការតវ៉ាបានផ្ទុះឡើងនៅទីក្រុងញូវដេលី ដោយទាមទារឲ្យរដ្ឋាភិបាលទទួលខុសត្រូវ បន្ទាប់ពីហេតុការណ៍នេះបានកើតឡើង កាលពីថ្ងៃសៅរ៍ (២៧ កក្កដា)។

នគរបាលបាននិយាយថា សិស្សទាំងនោះកំពុងសិក្សា នៅក្នុងបណ្ណាល័យដែលត្រូវបានសាងសង់ឡើង នៅក្នុងបន្ទប់ក្រោមដីនៃស្ថាប័នសិក្សាមួយ នៅពេលដែលទឹកហូរពីផ្លូវដែលលិចចូលទៅក្នុងបណ្ណាល័យនោះ ដែលនាំឲ្យមានដំណើរការខុសប្រក្រតី នៅក្នុងប្រព័ន្ធជីវមាត្រ។ ជាលទ្ធផល សិស្សទាំងនោះត្រូវបានជាប់នៅក្នុងបណ្ណាល័យដែលត្រូវបានទឹកលិចនោះ ហើយស្ត្រី ២នាក់ និងសិស្សប្រុសម្នាក់ បានបាត់បង់ជីវិត។

គណបក្ស ដែលកំពុងកាន់អំណាចរបស់ប្រទេសឥណ្ឌា គឺគណបក្ស Bharatiya Janata បាននាំគ្នាចេញទៅតវ៉ាទាំងកំហឹងប្រឆាំងនឹងគណបក្ស Aam Aadmi របស់ទីក្រុងញូវដលី ខណៈដែលកងកម្លាំងសន្តិសុខ បានប្រើប្រាស់កាណុងបាញ់ទឹក ដើម្បីបំបែកក្រុមបាតុករទាំងនោះ។

តែនិស្សិត ដែលបានធ្វើការតវ៉ា កាលពីថ្ងៃអាទិត្យ (២៨ កក្កដា) បាននិយាយថា អាជ្ញាធរកំពុងលាក់ចំនួនអ្នកស្លាប់ពិតប្រាកដ។ ហើយជាមួយគ្នានេះ ក្រុមអ្នកតវ៉ាក៏បានជួបជុំគ្នាអុជទៀន ដើម្បីទាមទាររកយុត្តិធម៌ជូនជនរងគ្រោះផងដែរ៕