ថ្ងៃប្រកួតកីឡាអូឡាំពិកប៉ារីស២០២៤ ដំណើរការបានបីថ្ងៃប្រកួតហើយ។ គិតត្រឹមថ្ងៃប្រកួតទី៣ ថ្ងៃទី២៩ ខែកក្កដា ឆ្នាំ២០២៤ ប្រទេសនៅតំបន់អាស៊ី ជប៉ុន ចិន កូរ៉េខាងត្បូង និងចិនហុងកុង ស្ថិត​នៅ​កំពូលតារាងចំណាត់ថ្នាក់មេដាយ១០លើគេ។

ជប៉ុនបន្តឈរលើគេ ក្រោយដណ្តើមបានមេដាយមាស៦គ្រឿង ប្រាក់២គ្រឿង និងសំរឹទ្ធ៤​គ្រឿង​សរុប​១២​គ្រឿង។ ជប៉ុនម្ចាស់ផ្ទះអូឡាំពិក២០២០ ឈ្នះមេដាយមាសលើប្រភេទកីឡាកាយសម្ព័ន្ធ គុនដាវ ពីរគ្រឿងពីយូដូ និង២គ្រឿងទៀតពីកីឡាស្កេតបត។ មេដាយប្រាក់ឈ្នះពីកីឡាស្កេតបត និងហែលទឹក ឯមេដាយសំរឹទ្ធកើតឡើងពីកីឡាជិះសេះ និងយូដូ។

ម្ចាស់ផ្ទះបារាំង ក្រោយបង្កើនមេដាយមាស ថ្ងៃប្រកួតទី៣ ឡើងមកឈរនៅចំណាត់ថ្នាក់លេខ២បណ្តោះអាសន្នជាមួយមេដាយមាស៥គ្រឿង ប្រាក់៨គ្រឿង និងសំរឹទ្ធ៣គ្រឿង សរុប១៦គ្រឿង។ មេដាយមាសទាំងប្រាំនោះដណ្តើមបានពីកីឡាទូកកានូ កង់ភ្នំ គុនដាវ បាល់ឱប និងហែលទឹក។ មេដាយប្រាក់ពីកីឡាបាញ់ធ្នូ កង់ភ្នំ ជិះសេះ គុនដាវ៣គ្រឿង និងយូដូ២គ្រឿង ខណៈមេដាយសំរឹទ្ធដណ្តើមបានពីកីឡាយូដូ៣គ្រឿង។

ម្ចាស់ផ្ទះអូឡាំពិក២០០៨ ចិនឈរនៅលេខ៣ ក្រោយឈ្នះមេដាយមាស៥គ្រឿង ប្រាក់៥គ្រឿង និងសំរឹទ្ធ២គ្រឿង។ ចិនដណ្តើមបានមេដាយមាសពីកីឡាពីរប្រភេទគឺលោតទឹក២គ្រឿង និងបាញ់កាំភ្លើង៣គ្រឿង។ មេដាយប្រាក់កើតពីកីឡាបាញ់ធ្នូ កាយសម្ព័ន្ធ បាញ់កាំភ្លើង និងហែលទឹក២គ្រឿង។ ឯមេដាយសំរឹទ្ធពីកីឡាហែលទឹក២គ្រឿង។

ចំណែកប្រទេសមកពីទ្វីបអូសេអានី អូស្ត្រាលី ឈរនៅចំណាត់ថ្នាក់លេខ៤ ជាមួយមេដាយសរុប ៩គ្រឿង ក្នុងនោះមាស៥គ្រឿងដែលធ្វើបានពីកីឡាទូកកានូ កង់គក់ និងហែលទឹក៣គ្រឿង និងមេដាយប្រាក់៤គ្រឿងដណ្តើមបានពីកីឡាជិះសេះ និងហែលទឹក៣គ្រឿង។

ប្រទេសអាស៊ីមួយទៀតកូរ៉េខាងត្បូង ឈរនៅលេខ៥ បន្ទាប់ពីឈ្នះមេដាយមាស៥គ្រឿង ប្រាក់៣គ្រឿង និងសំរឹទ្ធ១គ្រឿង។ មេដាយមាសពីកីឡាបាញ់កាំភ្លើង២គ្រឿង បាញ់ធ្នូ២គ្រឿង និងគុនដាវ១គ្រឿង។ មេដាយប្រាក់ពីកីឡាបាញ់កាំភ្លើង២គ្រឿង និងយូដូ និងមេដាយសំរឹទ្ធពីកីឡាកីឡាហែលទឹក។

សហរដ្ឋអាមេរិក បញ្ចប់ថ្ងៃប្រកួតទី៣ត្រឹមចំណាត់ថ្នាក់លេខ៦ ក្រោយដណ្តើមបានមេដាយមាស៣គ្រឿងពីកីឡាហែលទឹក២គ្រឿង និងកីឡាគុនដាវ មេដាយប្រាក់៨គ្រឿង និងសំរឹទ្ធ៩គ្រឿង សរុប២០គ្រឿង។

ចក្រភពអង់គ្លេស អ៊ីតាលី កាណាដា ចិនហុងកុង និងអាល្លឺម៉ង់ ដណ្តើមបានមេដាយមាស២គ្រឿងដូចគ្នា តែខុសគ្នាមេដាយប្រាក់ និងសំរឹទ្ធ។

រីឯកាហ្សាក់ស្ថាន អាហ្វ្រិកខាងត្បូង បែលហ្ស៊ិក អាស៊ែបៃហ្សង់ រ៉ូម៉ានី និងអួសបេគីស្ថាន ឈ្នះមេដាយមាសមួយគ្រឿងម្នាក់រៀងៗខ្លួន ខណៈដែលប្រេស៊ីល ស៊ុយអែត ហ្វីជី កូសូវ៉ូ ម៉ុងហ្គោលី ប៉ូឡូញ និងទុយនីស៊ីឈ្នះមេដាយប្រាក់ និងសំរឹទ្ធ។

សាធារណៈរដ្ឋម៉ុលដូវី ក្រូអាស៊ី អេហ្ស៊ីប អេស្ប៉ាញ ហុងគ្រី ឥណ្ឌា អៀរឡង់ ម៉ិចស៊ិក ស្វីស ស្លូវ៉ាគី តួកគី និងអ៊ុយក្រែន សុទ្ធតែដណ្តើមបានមេដាយសំរឹទ្ធ។

មកដល់ពេលនេះមានប្រទេស៣៦ហើយដែលដណ្តើមបានមេដាយមាស ប្រាក់ និងសំរឹទ្ធ។ ដោយឡែកប្រទេសនៅតំបន់អាស៊ីអាគ្នេយ៍ទាំង១១ មិនទាន់មានប្រទេសណាមួយដណ្តើមបានមេដាយនៅឡើយទេ។

សម្រាប់ថ្ងៃប្រកួតទី៤ (៣០ កក្កដា ២០២៤) កីឡាដែលឈានដល់ដណ្តើមមេដាយមាស មានកីឡាទ្រីអាត្លុង បាញ់កាំភ្លើង វាយកូនឃ្លីលើតុ យូដូ កាយសម្ព័ន្ធ បាល់ឱបនារី គុនដាវ ហែលទឹក និងកីឡាជិះក្តាបន្ទះលើទឹករលក៕