សហរដ្ឋអាមេរិក កំពុងដឹកនាំផ្នែកការទូតដើម្បីរារាំងអ៊ីស្រាអែល ពីការវាយប្រហាររដ្ឋធានី Beirut របស់ប្រទេសលីបង់ ឬហេដ្ឋារចនាសម្ព័ន្ធស៊ីវិលសំខាន់ៗ ក្នុងការឆ្លើយតបទៅនឹងការវាយប្រហារដោយគ្រាប់រ៉ុក្កែតដ៏បង្ហូរឈាមទៅលើតំបន់ខ្ពង់រាប Golan Heights។

យោងតាមមនុស្ស៥នាក់ រួមមានមន្ត្រីមកពីប្រទេសលីបង់ និងអ៊ីរ៉ង់ បូករួមទាំងអ្នកការទូតនៅមជ្ឈិមបូព៌ានិងអឺរ៉ុប បាននិយាយថា ទីក្រុងវ៉ាស៊ីនតោន កំពុងព្យាយាមដើម្បីបញ្ចៀសសង្គ្រាមពេញទំហឹងរវាងអ៊ីស្រាអែលនិងចលនាក្រុមហេសបូឡានៅលីបង់ដែលគាំទ្រដោយប្រទេសអ៊ីរ៉ង់ បន្ទាប់ពីការវាយប្រហារលើតំបន់ Golan កាន់កាប់ដោយអ៊ីស្រាអែល បណ្តាលឲ្យមនុស្ស១២នាក់ស្លាប់ កាលពីចុងសប្តាហ៍កន្លងទៅនេះ។ អ៊ីស្រាអែល និងសហរដ្ឋអាមេរិក បានដាក់កំហុសលើក្រុមហេសបូឡា សម្រាប់ការវាយប្រហារដោយគ្រាប់រ៉ុក្កែត ទោះបីជាក្រុមនេះ បានបដិសេធមិនទទួលខុសត្រូវក៏ដោយ។

ប្រភពព័ត៌មានដែលសុំមិនបញ្ចេញឈ្មោះបាននិយាយថា ការផ្តោតសំខាន់នៃផ្នែកការទូតឲ្យបានលឿននេះ គឺដើម្បីរារាំងការឆ្លើយតបរបស់អ៊ីស្រាអែល ដោយជំរុញឱ្យប្រទេសនេះកុំដាក់គោលដៅលើទីក្រុង Beirut ដែលមានប្រជាជនរស់នៅច្រើន និងនៅជាយក្រុងភាគខាងត្បូងនៃទីក្រុង ដែលបង្កើតជាទីក្រុងបេះដូងរបស់ក្រុមហេសបូឡា ឬហេដ្ឋារចនាសម្ព័ន្ធសំខាន់ៗផ្សេងទៀត ដូចជាអាកាសយានដ្ឋាន និងស្ពានជាដើម។

អនុប្រធានសភារបស់ប្រទេសលីបង់ លោក Elias Bou Saab បាននិយាយថា លោកបានទាក់ទងជាមួយអ្នកសម្របសម្រួលអាមេរិក លោក Amos Hochstein ចាប់តាំងពីការវាយប្រហារនៅតំបន់ Golan កាលពីថ្ងៃសៅរ៍ ដែលបានប្រាប់សារព័ត៌មានរ៉យទ័រថា អ៊ីស្រាអែល អាចបញ្ចៀសការគំរាមកំហែងនៃការរីកធំនៃជម្លោះ ដោយការប្រុងប្រយ័ត្ននៅរដ្ឋធានី និងតំបន់នៅជុំវិញនោះ។

លោកនិយាយថា ប្រសិនបើពួកគេបញ្ចៀសជនស៊ីវិល ហើយពួកគេបញ្ចៀសទីក្រុង Beirut និងនៅជាយក្រុង នោះការវាយប្រហាររបស់ពួកគេ អាចត្រូវបានវាយតម្លៃបានយ៉ាងល្អ។ មន្ត្រីអ៊ីស្រាអែល បាននិយាយថា ប្រទេសរបស់ពួកគេ ចង់បំផ្លាញក្រុមហេសបូឡា ប៉ុន្តែមិនអូសទាញតំបន់នេះ ឲ្យធ្លាក់ចូល ក្នុងសង្រ្គាមទាំងស្រុងនោះទេ។ អ្នកការទូតនៅមជ្ឈិមបូព៌ា និងអឺរ៉ុប ពីរនាក់ បាននិយាយថា អ៊ីស្រាអែល ពុំបានធ្វើការប្តេជ្ញាចិត្តណាមួយ ដើម្បីបញ្ចៀសការវាយប្រហារលើទីក្រុង Beirut តំបន់ជាយក្រុង ឬហេដ្ឋារចនាសម្ព័ន្ធស៊ីវិល នោះទេ។