ក្រុមប្រឹក្សាស្តីពីក្រុមតស៊ូមតិផ្នែកទំនាក់ទំនងអាមេរិក-អ៊ីស្លាម (CAIR) បាននិយាយនៅថ្ងៃអង្គារ (៣០ កក្កដា) នេះថា ការរើសអើង និងការវាយប្រហារប្រឆាំងនឹងជនជាតិមូស្លីម និងប៉ាឡេស្ទីន បានកើនឡើងប្រហែល ៧០ភាគរយនៅសហរដ្ឋអាមេរិក ក្នុងឆមាសទីមួយនៃឆ្នាំ២០២៤ ស្របពេលមានការកើនឡើងនៃការភ័យខ្លាចប្រឆាំងនឹងសាសនាអ៊ីស្លាម ដោយសារសង្រ្គាមរបស់អ៊ីស្រាអែល នៅតំបន់ហ្កាហ្សា។

ក្រុមអ្នកតស៊ូមតិសិទ្ធិមនុស្សបានរាយការណ៍ពីការកើនឡើងជាសកលនៅក្នុងការភ័យខ្លាច ឬស្អប់ខ្ពើមប្រឆាំងនឹងសាសនាអ៊ីស្លាម ការលំអៀងប្រឆាំងនឹងជនជាតិប៉ាឡេស្ទីន និងការប្រឆាំងនឹងជនជាតិជីហ្វ ចាប់តាំងពីការផ្ទុះឡើងនៃសង្រ្គាមអ៊ីស្រាអែល-ហ្កាហ្សា ក្នុងនៅក្នុងខែតុលាមក ដែលបានសម្លាប់មនុស្សរាប់ម៉ឺននាក់ និងបង្កឱ្យមានវិបត្តិមនុស្សធម៌។

ក្នុងពេលប្រាំមួយខែដំបូងនៃឆ្នាំ២០២៤នេះ ក្រុមប្រឹក្សា CAIR និយាយថាខ្លួនបានទទួលបណ្តឹងចំនួន ៤,៩៥១ករណីនៃឧប្បត្តិហេតុប្រឆាំងនឹងមូស្លីម និងប្រឆាំងនឹងជនជាតិប៉ាឡេស្ទីន ដែលកើនឡើងជិត ៧០ភាគរយ បើធៀបនឹងរយៈពេលដូចគ្នាក្នុងឆ្នាំ២០២៣។

ទីភ្នាក់ងារ CAIR នេះបន្ថែមថា បណ្តឹងភាគច្រើនគឺស្ថិតនៅក្នុងប្រភេទអន្តោប្រវេសន៍ និងសិទ្ធិជ្រកកោន ការរើសអើងការងារ ការរើសអើងការអប់រំ និងឧក្រិដ្ឋកម្មស្អប់ខ្ពើមជាដើម។ មានការតវ៉ាជាច្រើននៅក្នុងសហរដ្ឋអាមេរិក ដែលជាសម្ព័ន្ធមិត្តដ៏សំខាន់របស់អ៊ីស្រាអែល ប្រឆាំងនឹងសង្រ្គាមនៅតំបន់ហ្កាហ្សា ចាប់តាំងពីខែតុលា។

របាយការណ៍ CAIR បានកត់សម្គាល់ពីការបង្រ្កាបដោយនគរបាល និងអាជ្ញាធរសាកលវិទ្យាល័យ លើការតវ៉ាដែលគាំទ្រប៉ាឡេស្ទីន និងការបោះជំរំតវ៉ានៅតាមបរិវេណសាលានានាទូទាំងប្រទេស៕