ក្រុមហាម៉ាស បាននិយាយកាលពីថ្ងៃចន្ទថា នាយករដ្ឋមន្ត្រីអ៊ីស្រាអែលលោក បេនចាមីន ណេតាន់យ៉ាហ៊ូ (Benjamin Netanyahu) បានបន្ថែមលក្ខខណ្ឌ និងការទាមទារថ្មីចំពោះសំណើរបស់សហរដ្ឋអាមេរិកសម្រាប់បទឈប់បាញ់នៅតំបន់ហ្កហ្សា។

ក្រុមហាម៉ាស បាននិយាយនៅក្នុងសេចក្តីថ្លែងការណ៍មួយថា៖«យើងត្រូវបានជូនដំណឹងដោយអ្នកសម្របសម្រួលអំពីអ្វីដែលបានកើតឡើងនាពេលថ្មីៗនេះ នៅក្នុងកិច្ចប្រជុំនៅទីក្រុងរ៉ូម ទាក់ទងនឹងបទឈប់បាញ់ និងការចរចាដោះដូរអ្នកទោស»។

ក្រុមនេះ បានបន្ថែមថា៖«វាច្បាស់ណាស់ពីអ្វីដែលអ្នកសម្រុះសម្រួលបង្ហាញថា លោក ណេតាន់យ៉ាហ៊ូ បានត្រឡប់ទៅយុទ្ធសាស្ត្រនៃការលើកពេល ការពន្យារពេល និងការគេចវេសពីការឈានដល់កិច្ចព្រមព្រៀងដោយកំណត់លក្ខខណ្ឌ និងការទាមទារថ្មី»។

គួរកត់សម្គាល់ផងដែរ កាលពីថ្ងៃអាទិត្យ កិច្ចប្រជុំរួមរបស់មន្ត្រីជាន់ខ្ពស់មកពីអ៊ីស្រាអែល កាតា អេហ្ស៊ីប និងសហរដ្ឋអាមេរិក ត្រូវបានធ្វើឡើងនៅទីក្រុងរ៉ូម ប្រទេសអ៊ីតាលី ដើម្បីពិភាក្សាអំពីកិច្ចព្រមព្រៀងឈប់បាញ់ និងកិច្ចព្រមព្រៀងដោះដូរអ្នកទោស។