ការប្រកួតវិញ្ញាសាទ្រីយ៉ាត្លុងឯកត្តជនផ្នែកបុរស នៅឯព្រឹត្តិការណ៍អូឡាំពិកទីក្រុងប៉ារីសឆ្នាំ២០២៤ ត្រូវបានពន្យារពេល បន្ទាប់ពីការធ្វើតេស្តបង្ហាញថា គុណភាពទឹកនៅក្នុងទន្លេសែន (River Seine) មិនមានកម្រិតតាមស្តង់ដារដែលត្រូវការ។

ការប្រកួតប្រជែងនឹងចាប់ផ្តើមនៅម៉ោង ៨:០០ (ម៉ោងក្នុងស្រុក) នាថ្ងៃអង្គារ (ទី៣០ ខែកក្កដា) នេះ ហើយឥឡូវនេះ នឹងប្រព្រឹត្តទៅនៅថ្ងៃពុធវិញ វេលាម៉ោង ៩:៤៥ (ម៉ោងក្នុងស្រុក) បន្ទាប់ពីបញ្ចប់ព្រឹត្តិការណ៍ផ្នែកនារី។ 

វគ្គហ្វឹកសមហែលទឹក ត្រូវបានលុបចោល កាលពីថ្ងៃអាទិត្យ (ទី២៨ ខែកក្កដា) និងថ្ងៃចន្ទ (ទី២៩ ខែកក្កដា) ដោយសារគុណភាពទឹកមិនសូវល្អ ដែលបានរងផលប៉ះពាល់ដោយសារភ្លៀងធ្លាក់ខ្លាំង នាពេលថ្មីៗនេះ។ ថ្ងៃសុក្រ ទី២ ខែសីហា នៅតែជាកាលបរិច្ឆេទសម្រាប់ការប្រកួតទាំង២ ខណៈអ្នករៀបចំ បាននិយាយថា ជាជម្រើសចុងក្រោយ ព្រឹត្តិការណ៍នេះអាចត្រូវបានប្ដូរទៅប្រកួតប្រជែងជាវិញ្ញាសាឌុយយ៉ាត្លុង (Duathlon) វិញ។

សហព័ន្ធកីឡាទ្រីយ៉ាត្លុងពិភពលោក បានឲ្យដឹងថា៖ «ការធ្វើតេស្តដែលបានធ្វើឡើងនៅក្នុងទន្លេសែនថ្ងៃនេះ បានបង្ហាញថា គុណភាពទឹកមិនបានផ្តល់នូវការធានាគ្រប់គ្រាន់ ដើម្បីអាចឲ្យព្រឹត្តិការណ៍នេះកើតឡើងបានឡើយ។ ទោះបីជាមានការកែលម្អកម្រិតគុណភាពទឹកក៏ដោយ ការអាននៅចំណុចមួយចំនួននៃវគ្គសិក្សាហែលទឹកនៅតែលើសពីដែនកំណត់ដែលអាចទទួលយកបាន។"

គួរបញ្ជាក់ថា ការធ្វើតេស្តកំពុងត្រូវបានអនុវត្តជារៀងរាល់ថ្ងៃលើគុណភាពទឹកនៅទន្លេសែន ជាកន្លែងដែលនឹងត្រូវរៀបចំការប្រកួតវិញ្ញាសាទ្រីយ៉ាត្លុងចម្រុះ នៅថ្ងៃទី៥ ខែសីហា វិញ្ញាសាហែលទឹករយៈចម្ងាយឆ្ងាយអូឡាំពិក នៅថ្ងៃទី៨ និង 9 ខែសីហា និងវិញ្ញាប៉ារ៉ាទ្រីយ៉ាត្លុង ក្នុងព្រឹត្តិការណ៍ប៉ារ៉ាឡាំពិក ដែលត្រូវចាប់ផ្តើមនៅថ្ងៃទី២៨ ខែសីហា។

អ្នករៀបចំបាននិយាយថា ទឹកប្រាក់ប្រហែល ១,៤ពាន់លានអឺរ៉ូ (១,៥ពាន់លានដុល្លារ) ត្រូវបានចំណាយលើគម្រោងវិសុទ្ធកម្ម ដើម្បីធ្វើឲ្យការហែលទឹកទន្លសែនមានសុវត្ថិភាព បន្ទាប់ពីមានការហាមឃាត់អាយុកាល ១០០ឆ្នាំ៕