រដ្ឋមន្ត្រីការបរទេសអូស្ត្រាលី លោកស្រី Penny Wong នៅថ្ងៃអង្គារ (ទី៣០ ខែកក្កដា) នេះ បាននិយាយថា កតិកាសញ្ញាសន្តិសុខដែលចុះហត្ថលេខាដោយរុស្ស៊ី និងកូរ៉េខាងជើង កំពុងធ្វើឲ្យតំបន់អស្ថិរភាព ដោយលោកស្រីបានបន្ថែមថា កូរ៉េខាងជើងកំពុងផ្តល់អាវុធដល់រុស្ស៊ី ដែលនេះជា «ការរំលោភយ៉ាងជាក់ស្ដែង» លើសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។

ការលើកឡើងបែបនេះរបស់លោកស្រី Wong បានកើតមានឡើងអំឡុងពេលលោកស្រីនិយាយទៅកាន់អ្នកសារព័ត៌មាន នៅទីក្រុង Paju បន្ទាប់ពីបានធ្វើដំណើរទស្សនកិច្ចទៅកាន់តំបន់គ្មានយោធា (DMZ) នៅក្បែរនោះ ពោលគឺជាទីតាំងបំបែកប្រទេសកូរ៉េទាំង២ ដែលតាមលក្ខណៈបច្ចេកទេស នៅតែមានសង្គ្រាមជាមួយគ្នា។

ដោយសំដៅលើកិច្ចព្រមព្រៀងសន្តិសុខដែលត្រូវបានចុះហត្ថលេខាដោយមេដឹកនាំកូរ៉េខាងជើងលោក គីម ជុងអ៊ុន (Kim Jong Un) និងប្រធានាធិបតីរុស្ស៊ីលោក វ៉្លាឌីមៀរ ពូទីន (Vladimir Putin) កាលពីខែមិថុនា លោកស្រី Wong បាននិយាយថា៖ «យើងឃើញហើយថា សកម្មភាពរបស់រស្ស៊ីមិនអំណោយផលដល់សន្តិភាពទាល់តែសោះ ប៉ុន្តែមានការកើនឡើងលំដាប់»។

គួរបញ្ជាក់ថា នៅក្រោមកតិកាសញ្ញានោះ កូរ៉េខាងជើង និងរុស្ស៊ី បានយល់ព្រមផ្តល់ជំនួយយោធាឲ្យគ្នាទៅវិញទៅមកភ្លាមៗ ប្រសិនបើប្រទេសទាំង២ ប្រឈមនឹងការលុកលុយប្រដាប់អាវុធ។

ទីក្រុងវ៉ាស៊ីនតោន និងសម្ព័ន្ធមិត្តរបស់ខ្លួន ក៏ព្រួយបារម្ភផងដែរ ចំពោះកិច្ចសហប្រតិបត្តិការយោធាកាន់តែមានភាពស៊ីជម្រៅ រវាងរុស្ស៊ី និងកូរ៉េខាងជើង ហើយបានចោទប្រកាន់ប្រទេសទាំង២ថា បានបំពានច្បាប់អន្តរជាតិ ដោយការជួញដូរអាវុធឲ្យរុស្ស៊ីយកទៅប្រើប្រាស់ប្រឆាំងនឹងប្រទេសអ៊ុយក្រែន។ តែទីក្រុងព្យុងយ៉ាង និងក្រុងមូស្គូ បានបដិសេធមិនបានធ្វើប្រតិបត្តិការអាវុធនោះទេ៕