ទីភ្នាក់ងារព័ត៌មានផ្លូវការ IRNA រាយការណ៍នៅថ្ងៃអង្គារនេះថា បេសកកម្មអចិន្ត្រៃយ៍របស់ប្រទេសអ៊ីរ៉ង់ប្រចាំនៅអង្គការសហប្រជាជាតិក្នុងទីក្រុងញូវយ៉ក បានច្រានចោលការអះអាងរបស់មន្ត្រីចារកម្មសហរដ្ឋអាមេរិកថា ទីក្រុងតេអេរ៉ង់ ព្យាយាមធ្វើឲ្យប៉ះពាល់ដល់ការបោះឆ្នោតប្រធានាធិបតី សហរដ្ឋអាមេរិក។

ការនិយាយបែបនេះ ត្រូវបានធ្វើឡើងនៅក្នុងសេចក្តីថ្លែងការណ៍មួយ ដែលបានចេញផ្សាយកាលពីថ្ងៃចន្ទ បន្ទាប់ពីមន្ត្រីស៊ើបការណ៍សម្ងាត់របស់អាមេរិក បានអះអាងថា អ៊ីរ៉ង់កំពុងធ្វើការដើម្បី «មានឥទ្ធិពលលើការបោះឆ្នោតប្រធានាធិបតីសហរដ្ឋអាមេរិក និងធ្វើឱ្យអន្តរាយដល់បំណងរបស់លោក Donald Trump ក្នុងការដណ្តើមយកសេតវិមានមកវិញ។

បេសកកម្មអចិន្ត្រៃយ៍ របស់ប្រទេសអ៊ីរ៉ង់ បានសង្កត់ធ្ងន់ថា ទីក្រុងតេអេរ៉ង់ ពុំមានគោលបំណង ឬសកម្មភាព ដើម្បីធ្វើឲ្យប៉ះពាល់ដល់ការបោះឆ្នោតរបស់សហរដ្ឋអាមេរិកនោះទេ ហើយផ្នែកសំខាន់នៃការចោទប្រកាន់នេះ គឺស្ថិតនៅក្នុងក្របខ័ណ្ឌនៃ «ប្រតិបត្តិការចិត្តសាស្ត្រ ដែលត្រូវបានរៀបចំឡើងដើម្បីពង្រឹងយុទ្ធនាការបោះឆ្នោត» នៅក្នុងសហរដ្ឋអាមេរិក។

ការបោះឆ្នោតប្រធានាធិបតី អាមេរិក គ្រោងធ្វើឡើងនៅថ្ងៃទី៥ ខែវិច្ឆិកា ឆ្នាំ២០២៤។