អ្នករៀបចំបានសម្រេចថាការប្រកួតកីឡាអូឡាំពិកវិញ្ញាសារទ្រីអាត្លុងផ្នែកបុរស និងនារី នឹងដំណើរការនៅថ្ងៃពុធ (៣១ កក្កដា) នេះបន្ទាប់ពីការធ្វើតេស្តទឹកទន្លេសែន (Seine) ចុងក្រោយបង្អស់បានបង្ហាញពីកម្រិតទាបនៃបាក់តេរី ដោយបញ្ចប់ភាពមិនប្រាកដប្រជាលើថាតើកីឡាហែលទឹកកណ្តាលទីក្រុងប៉ារីសនេះអាចដំណើរការបានដែរឬទេ បន្ទាប់ពីមានភ្លៀងធ្លាក់ខ្លាំង។

ការសម្រេចនេះជាភាពធូរចិត្តសម្រាប់អត្តពលិកដែលរំពឹងថានឹងប្រកួត និងសម្រាប់អាជ្ញាធរក្រុងប៉ារីសដែលបានសន្យានឹងអ្នកស្រុកថាធ្វើឱ្យទន្លេសែនជាទន្លេដែលអាចហែលបាន និងជាកេរដំណែលយូរអង្វែងនៃហ្គេម ដោយកីឡាទ្រីអាត្លុងនេះជាការធ្វើតេស្តបង្ហាញជាសាធារណៈ។

អាជ្ញាធរអូឡាំពិកប៉ារីស ២០២៤ និងកីឡាទ្រីអាត្លុងពិភពលោក (World Triathlon) បាននិយាយនៅក្នុងសេចក្តីថ្លែងការណ៍មួយថា «លទ្ធផលនៃការវិភាគទឹកចុងក្រោយបំផុតដែលទទួលបាននៅម៉ោង ៣:២០ព្រឹកព្រលឹម ត្រូវបានវាយតម្លៃថាអនុលោមតាមការកំណត់របស់កីឡាទ្រីអាត្លុងពិភពលោក ដែលអនុញ្ញាតឱ្យការប្រកួតកីឡាទ្រីអាត្លុង អាចប្រព្រឹត្តិទៅបាន»។

អត្តពលិកនារីចំនួន ៥៥នាក់ដែលតំណាងឱ្យ ៣៤ប្រទេសនឹងចាប់ផ្តើមការប្រកួតនៅម៉ោង ៨ព្រឹក (ម៉ោងក្នុងស្រុក) ចំណែកព្រឹត្តិការណ៍បុរសនឹងប្រព្រឹត្តទៅនៅម៉ោង ១០:៤៥ព្រឹក ភ្លាមៗបន្ទាប់ពីការប្រកួតផ្នែកនារី។ ទីក្រុងប៉ារីស បានចំណាយថវិការដ្ឋចំនួន ១,៤ពាន់លានអឺរ៉ូ (១,៥២ពាន់លានដុល្លារ) លើហេដ្ឋារចនាសម្ព័ន្ធទឹកសំណល់ ដើម្បីទប់ទឹកស្អុយ និងកាត់បន្ថយការហូរចូលទៅក្នុងទន្លេ ហើយអភិបាលក្រុងប៉ារីស លោកស្រី អានី ហ៊ីដាល់ហ្គោ (Anne Hidalgo) បានចុះមុជទឹកនៅទន្លេនេះកាលពីដើមខែនេះ ក្នុងគោលបំណងបញ្ជាក់ថាទឹកទន្លេសែននឹងមិនធ្វើឱ្យពួកគេឈឺនោះទេ៕