ក្រសួងការបរទេសអាមេរិក បាននិយាយកាលពីថ្ងៃអង្គារ (៣១ កក្កដា) ថា សហរដ្ឋអាមេរិកនឹងបន្តកិច្ចចរចាការទូត ដើម្បីបញ្ចៀសការកើនឡើងនៃជម្លោះរវាងអ៊ីស្រាអែល និងក្រុមហេសបូឡា នៅប្រទេសលីបង់។

អ្នកនាំពាក្យក្រសួងការបរទេស លោក វេឌែន ផាថែល (Vedant Patel) បានប្រាប់សន្និសីទខ្លីមួយថា «យើងកំពុងបន្តធ្វើការឆ្ពោះទៅរកដំណោះស្រាយការទូតដែលនឹងអនុញ្ញាតឱ្យជនស៊ីវិលអ៊ីស្រាអែល និងលីបង់ត្រឡប់ទៅផ្ទះសម្បែងរបស់ពួកគេវិញ ហើយរស់នៅក្នុងសន្តិសុខ និងសន្តិសុខ។ យើងពិតជាចង់បញ្ចៀសនូវគ្រប់កំណើននៃភាពតានតឹងទាំងអស់»។

លោក Patel បានលើកឡើងបែបនេះបន្ទាប់ពីការវាយប្រហារមួយនៅជាយក្រុងបេរូត ដែលយោធាអ៊ីស្រាអែលបាននិយាយថាធ្វើឡើងប្រឆាំងនឹងមេបញ្ជាការជាន់ខ្ពស់ក្រុមហេសបូឡា ដែលខ្លួននិយាយថាជាមេខ្លោងក្នុងការវាយប្រហារលើតំបន់ខ្ពង់រាប ហ្កូឡាន់ (Golan Heights) ដែលបានសម្លាប់កុមារ និងក្មេងជំទង់ ១២នាក់។

លោក Patel បដិសេធមិនធ្វើអត្ថាធិប្បាយទេនៅពេលត្រូវបានសាកសួរអំពីឧប្បត្តិហេតុនេះ ដោយគ្រាន់តែនិយាយថា «រឿងដែលបានកើតឡើងនេះគឺច្បាស់លាស់ហើយ»។ លោកបានរំលឹកឡើងវិញថា ការគាំទ្ររបស់អាមេរិកចំពោះអ៊ីស្រាអែល នៅតែ «រឹងមាំដូចដែកថែប» ក្នុងលដែលរដ្ឋជ្វីហ្វមួយនេះប្រឈមមុខនឹងការគំរាមកំហែងពីអ៊ីរ៉ង់ និង «ក្រុមប្រយុទ្ធតំណាងអ៊ីរ៉ង់» ដូចជាក្រុមហេសបូឡានេះជាដើម៕