អាជ្ញាធរសុខាភិបាលនៅតំបន់ហ្កាហ្សាស្ទ្រីប បានប្រកាសកាលពីថ្ងៃចន្ទ (២៩ កក្កដា) ថា ជំងឺស្វិតដៃជើងបានផ្ទុះឡើងពាសពេញតំបន់ហ៊ុមព័ទ្ធប៉ាឡេស្ទីនមួយនេះ ដោយបន្ទោសប្រតិបត្តិការយោធាអ៊ីស្រាអែលចំពោះការខូចខាតដល់ប្រព័ន្ធអនាម័យ និងប្រព័ន្ធវេជ្ជសាស្រ្ដ ដែលបានធ្វើឱ្យមានការរីករាលដាលនៃមេរោគដ៏កាចសាហាវនេះ។

ក្រសួងសុខាភិបាលបាននិយាយថា ប៉ុន្មានឆ្នាំបន្ទាប់ពីជំងឺស្វិតដៃជើងត្រូវបានលុបបំបាត់នៅប៉ាឡេស្ទីន មេរោគនេះត្រូវបានរកឃើញម្តងទៀតនៅក្នុងទឹកសំណល់នៅទីក្រុង ខាន់យូនីស (Khan Younis) ភាគខាងត្បូងហ្កាហ្សា និងផ្នែកកណ្តាលនៃតំបន់នេះ ដែលបង្កការគំរាមកំហែងដល់សុខភាពដល់អ្នករស់នៅក្នុងតំបន់ហ្កាហ្សា និងប្រទេសជិតខាង។

អង្គការសុខភាពពិភពលោក (WHO) ថ្មីៗនេះបានរាយការណ៍ថាអ្នកស្រាវជ្រាវរបស់ខ្លួនបានរកឃើញមេរោគជំងឺស្វិតដៃជើង នៅក្នុងសំណាកទឹកស្អុយចំនួន៦ទីតាំង ដែលប្រមូលបាននៅក្រុង ខាន់យូនីស និងកន្លែងផ្សេងទៀតនៅតំបន់ហ្កាហ្សាស្ទ្រីប ដោយនិយាយថាខ្លួនមានការព្រួយបារម្ភយ៉ាងខ្លាំងចំពោះស្ថានភាពនេះ។

អាជ្ញាធរសុខាភិបាលហ្កាហ្សាបាននិយាយថា ខ្លួននឹងធ្វើការជាមួយមូលនិធិសង្គ្រោះកុមារអន្តរជាតិរបស់អង្គការសហប្រជាជាតិ (UNICEF) អង្គការសុខភាពពិភពលោក (WHO) និងក្រុមដទៃទៀត ដើម្បីដោះស្រាយជាមួយនឹងជំងឺគ្រុនស្វិតដៃជើង ខណៈនិយាយថា ការចាត់វិធានការដើម្បីបញ្ចប់ប្រតិបត្តិការយោធាអ៊ីស្រាអែលនៅហ្កាហ្សា មានសារៈសំខាន់ខ្លាំងជាងបញ្ហាណាៗទាំងអស់ និងដោះស្រាយឫសគល់នៃកង្វះការផ្គត់ផ្គង់ទឹក និងអនាម័យ និងការចោលកាកសំណល់៕