​តេ​ក្វាន់​ដូ​៖ ការប្រកួត​កីឡា​តេ​ក្វាន់​ដូ​ពានរង្វាន់​ឯកអគ្គរដ្ឋទូត​កូរ៉េឆ្នាំ​២០២១ ឬ 2021 Korean Ambassadors Cup Taekwondo Competition ដែល​រៀបចំ​ដោយ​ខេ​មរ​សហព័ន្ធ​តេ​ក្វាន់​ដូ WT បានបញ្ចប់​ដោយ​ជោគជ័យ ក្រោយ​ដំណើរ​ការប្រកួត​តាម​អន​ឡាញ​រយៈពេល ១​សប្ដាហ៍​កន្លងទៅដោយមាន​កីឡាករ​-​កីឡាការិនី ១៧៥​នាក់មកពី ១៦​រាជធានី​-​ខេត្ត​ចូលរួម។​

​ក្រោយ​រកឃើញ​ម្ចាស់​ជ័យលាភី សហព័ន្ធ​បានរៀបចំ​នូវ​ពិធី​ប្រគល់​រង្វាន់​លក្ខណៈ​ចង្អៀត ដោយ​គោរព​តាម​វិធានការ​សុខាភិបាលក្រោម​វត្តមាន​លោក ជ្រិ​ន សុធា អគ្គលេខាធិការ​សហព័ន្ធតំណាង​ឯកឧត្តម​បណ្ឌិតសភា​ចា​រ្យ ហង់​ជួន ណា​រ៉ុ​ន រដ្ឋមន្ត្រីក្រសួង​អប់រំ យុវជន និង​កីឡា និង​ជា​ប្រធាន​ខេ​មរ​សហព័ន្ធ​តេ​ក្វាន់​ដូ WT រួមទាំង​លោក Park Heung Kyeong ឯកអគ្គរដ្ឋទូត​សាធារណរដ្ឋ​កូរ៉េខាងត្បូង​ប្រចាំ​នៅ​កម្ពុជា​ផងដែរ។​ ​ថ្លែង​ក្នុង​ពិធី​បិទ​ការប្រកួត​លោក ជ្រិ​ន សុធា បាន​ថ្លែងអំណរគុណចំពោះ​ស្ថានទូត​សាធារណរដ្ឋ​កូរ៉េ ដែល​បាន​ឧបត្ថម្ភ​គាំទ្រ​ដល់​ការប្រកួត​នេះ​រៀងរាល់ឆ្នាំតាំងពី​ឆ្នាំ​២០១៤ មកម្ល៉េះ​។ លោក​ចាត់ទុក​ការប្រកួត​នេះគឺជា​ផ្នែក​មួយ​ដ៏​សំខាន់ ដើម្បី​ជំរុញ​ការអភិវឌ្ឍ​កីឡា​តេ​ក្វាន់​ដូ WT នៅ​កម្ពុជា តាមរយៈ​ការផ្ដល់​ឱកាស​ឲ្យ​កីឡាករ​-​កីឡាការិនី​បាន​ចូលរួម​ប្រកួតប្រជែង និង​បង្ហាញ​នូវ​សមត្ថភាព​របស់ខ្លួន។​

​ទន្ទឹម​ជាមួយគ្នា​លោក Park Heung Kyeong ក៏បាន​ថ្លែងអំណរគុណ​ចំពោះ​ប្រធាន​សហព័ន្ធ​ឯកឧត្តម​បណ្ឌិត​សភាចា​រ្យ ហង់​ជួន ណា​រ៉ុ​ន ដែល​បាន​ចំពោះ​ការប្រកួត​នេះ​ឡើង​រៀងរាល់ឆ្នាំ ពិសេស​លោក​បាន​វាយតម្លៃ​ខ្ពស់ចំពោះ​សហព័ន្ធ​នៅក្នុង​បរិបទ​កូ​វីដ​-១៩ នៅតែមាន​សកម្ម​ភាពលេច​ធ្លោដោយមាន​ក្រុម​អត្ត​ព​លិ​ក​ចូលរួម ​ប្រកួតប្រជែង​គួរ​ឲ្យ​កត់សម្គាល់​លើ​ប្រភេទ​កីឡា​អូឡាំពិក​នេះ។​ ​ចំពោះ​លទ្ធផល​ការប្រកួត​វិញ សម្រាប់​វិញ្ញាសា​មេគុន​ឯកត្តជន​បុរស​-​នារី​អាយុ​ក្រោម​១៥​ឆ្នាំ (​ខ្សែក្រវាត់​ខៀវ​) កីឡាករ ប៊​ន បញ្ញា ទទួលបាន​មេដាយមាសមកពី​ក្លិប DAIL និង​កីឡា​កា​រិ​និ រិ​ទ្ធ ថា​វី ទទួលបាន​មេដាយមាសមកពី​ក្លិប WONGKWANG ខេត្តបាត់ដំបង។ វិញ្ញាសា​មេគុន​ឯកត្តជន​បុរស​-​នារីអាយុ ១៥​ឆ្នាំ​ឡើង (​ខ្សែក្រវាត់​ខៀវ ) កីឡាករ សំ ថា​រ៉ា ទទួលបាន​មេដាយមាសមកពី​ខេត្តកណ្តាល និង​កីឡា​កា​រិ​និ តាំង មួយ​ហៀ​ង ទទួលបាន​មេដាយមាសមកពី​ក្លិប THE BEST ភ្នំពេញ។

​ចំណែក​វិញ្ញាសា​មេគុន​ឯកត្តជន​បុរស​-​នារីអាយុ​ក្រោម ១៥​ឆ្នាំ (​ខ្សែក្រវាត់​ខ្មៅ ១​ដាន់​) កីឡាករ ស៊ឹម សុខ​ហ៊ាង ទទួលបាន​មេដាយមាសមកពី​ក្លិប​សាមគ្គី​-​ភ្នំពេញ និង​កីឡាការិនី ហ៊ីង មុន្នី​បញ្ញា ទទួលបាន​មេដាយមាសមកពី​មកពី NEW WORLD ភ្នំពេញ និង​វិញ្ញាសា​មេគុន​ឯកត្តជន​បុរស​-​នារីមិន​គិត​អាយុ ចាប់ពី​ខ្សែក្រវាត់​ខ្មៅ ២​ដាន់​ឡើង កីឡាករ ធួន ណា​វុ​ធ ទទួលបាន​មេដាយមាសមកពី​ក្លិប INR ភ្នំពេញ និង​កីឡាការិនី ណា​ង វណ្ណៈ ទទួលបាន​មេដាយមាសមកពី​ក្លិប​ប៉ូលីស​-​ភ្នំពេញ៕

​អត្ថបទ៖ លី ឈុន​ឡា