នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម (Anwar Ibrahim) នៅថ្ងៃព្រហស្បតិ៍ (០១ សីហា) នេះបានរិះគន់ខ្លាំងៗលើក្រុមហ៊ុន មេតា (Meta Platforms) ថាជាស្ថាប័នកំសាក បន្ទាប់ពីការបង្ហោះក្នុងហ្វេសប៊ុក (Facebook) របស់លោកស្តីពីការធ្វើឃាតមេដឹកនាំក្រុមហាម៉ាស លោក អ៊ីស្មេល ហានីយេ (Ismail Haniyeh) ត្រូវបានលុបចោល នៅក្នុងការប៉ះទង្គិចចុងក្រោយបំផុតរបស់រដ្ឋាភិបាលម៉ាឡេស៊ីជាមួយក្រុមហ៊ុននេះលើមាតិកាដែលត្រូវបានរារាំង។

ម៉ាឡេស៊ី ដែលពលរដ្ឋភាគច្រើនជាជនជាតិមូស្លីម គឺជាអ្នកគាំទ្របុព្វហេតុប៉ាឡេស្ទីន ហើយលោក Anwar បានបង្ហោះវីដេអូនៃការហៅទូរសព្ទរបស់លោកជាមួយមន្ត្រីហាម៉ាស ដើម្បីចូលរួមរំលែកទុក្ខចំពោះការស្លាប់របស់លោក Haniyeh ប៉ុន្តែក្រោយមកត្រូវបានលុបចោល។

លោក Anwar ដែលបានជួបជាមួយលោក Haniyeh នៅកាតាកាលពីខែឧសភា បាននិយាយថា លោកមានទំនាក់ទំនងល្អជាមួយថ្នាក់ដឹកនាំនយោបាយរបស់ក្រុមហាម៉ាសរូបនេះ ប៉ុន្តែមិនមានទំនាក់ទំនងលើកម្រិតយោធាទេ។ លោក Anwar បានបង្ហោះនៅលើទំព័រហ្វេសប៊ុករបស់លោកថា «អនុញ្ញាតឱ្យនេះជាសារច្បាស់លាស់ទៅកាន់ Meta ថា សូមបញ្ឈប់ការបង្ហាញភាពកំសាកនេះទៀតទៅ»។

ម៉ាឡេស៊ី ធ្លាប់បានត្អូញត្អែរទៅកាន់ Meta ជុំវិញការលុបចោលខ្លឹមសាររបស់ខ្លួន រួមទាំងការផ្សាយព័ត៌មានក្នុងស្រុកអំពីជំនួបចុងក្រោយរបស់លោក Anwar ជាមួយលោក Haniyeh ដែលក្រោយមកត្រូវបានស្ដារឡើងវិញ។ ក្រុមហ៊ុន Meta នៅពេលនោះបាននិយាយថា ខ្លួនមិនមានចេតនាប្រើការគាបសង្កត់លើវេទិកា Facebook របស់ខ្លួនទេ ហើយក៏មិនរឹតបន្តឹងខ្លឹមសារដែលគាំទ្រប៉ាឡេស្ទីនដែរ៕