នគរបាលអង់គ្លេស កាលពីថ្ងៃពុធ (ទី៣១ ខែកក្កដា) បានប្រាប់ឲ្យដឹងថា ក្មេងប្រុសអាយុ ១៧ឆ្នាំម្នាក់ ដែលស្ថិតនៅក្នុងការឃុំឃាំងរួចហើយ ត្រូវបានចោទប្រកាន់ពីបទឃាតកម្ម ពាក់ព័ន្ធនឹងការស្លាប់របស់ក្មេងស្រី ៣នាក់ ក្នុងហេតុការណ៍វាយប្រហារដោយកាំបិត នៅទីក្រុង Southport ខណៈដែលការធ្វើបាតុកម្មទាំងកំរោល បានកើតឡើងនៅទីក្រុងឡុងដ្រ៍ ដោយមានការបន្ទរការស្តីបន្ទោសទៅលើជនអន្តោប្រវេសន៍។

នគរបាលបានប្រាប់ថា ក្មេងជំទង់រូបនេះ នឹងត្រូវបានឃុំខ្លួននៅក្នុងមន្ទីរឃុំឃាំង ហើយនឹងបង្ហាញខ្លួននៅតុលាការ Liverpool Magistrates នាថ្ងៃព្រហស្បតិ៍ (ទី១ ខែសីហា) នេះ។

គួរបញ្ជាក់ថា ក្មេងប្រុសអាយុ ១៧ឆ្នាំរូបនេះ ត្រូវបាននគរបាលឃុំខ្លួនដោយសង្ស័យពីបទមនុស្សឃាត និងប៉ុនប៉ងមនុស្សឃាត បន្ទាប់ពីមានហេតុការណ៍បង្ហូរឈាម កាលពីថ្ងៃទី២៩ ខែកក្កដា នៅឯ «កន្លែងសិក្ខាសាលាហាត់យោហ្កា និងរាំឈ្មោះ Taylor Swift» ដែលជាព្រឹត្តិការណ៍វិស្សមកាលរដូវក្តៅ សម្រាប់កុមារអាយុចន្លោះពី ៦ឆ្នាំ ទៅ ១១ឆ្នាំ នៅទីក្រុងមាត់សមុទ្ររបស់ប្រទេសអង់គ្លេស។ ក្មេងស្រី ៣នាក់ ដែលត្រូវបានសម្លាប់នោះ មានអាយុពី ៦ឆ្នាំ ទៅ ៩ឆ្នាំ។

នគរបាលបាននិយាយថា ជនជាប់ចោទ មិនអាចបញ្ចេញឈ្មោះឲ្យដឹងបានឡើយ ដោយសារហេតុផលផ្លូវច្បាប់ ព្រោះរូបគេមានអាយុក្រោម ១៨ឆ្នាំ។ កាលពីថ្ងៃទី៣០ ខែកក្កដា ការបង្កចលាចល នៅទីក្រុង Southport បានកើតឡើងបន្ទាប់ពីព័ត៌មានមិនពិតដែលត្រូវបានផ្សព្វផ្សាយនៅលើបណ្តាញសង្គមថា ជនសង្ស័យនៅពីក្រោយការចាក់សម្លាប់នេះ គឺជាជនចំណាកស្រុកអ៊ិស្លាមជ្រុលនិយម។

នៅទីក្រុងឡុងដ្រ៍ នាថ្ងៃទី៣១ ខែកក្កដានេះ មនុស្សរាប់ពាន់នាក់បានប្រមូលផ្តុំគ្នា នៅជិតវិមាន Downing Street របស់នាយករដ្ឋមន្ត្រី ដោយស្រែកថា «Save Our Kids» (សង្គ្រោះក្មេងៗរបស់យើង) «We Want Our Country Back» (យើងចង់បានប្រទេសយើងត្រឡប់មកវិញ) និង «Stop The Boats» (រារាំងទូករបស់ជនអន្តោប្រវេសន៍) ក៏ដូចជាការស្រែកច្រៀងចម្រៀងប្រចាំក្រុមបាល់ទាត់អង់គ្លេសផងដែរ៕