ក្រសួងការពារជាតិ បានឲ្យដឹងថា បុរស ៣នាក់ដែលត្រូវបានចោទប្រកាន់ពីបទរៀបគម្រោងផែនការវាយប្រហារ ថ្ងៃទី១១ ខែកញ្ញា ឆ្នាំ២០០១ លើសហរដ្ឋអាមេរិក បានឈានដល់កិច្ចព្រមព្រៀងមុនកាត់ក្តី។

គួរបញ្ជាក់ថា ជនជាប់ចោទ លោក Khalid Sheikh Mohammed លោក Walid Muhammad Salih Mubarak Bin Attash និងលោក Mustafa Ahmed Adam al-Hawsawi ត្រូវបានឃុំខ្លួននៅឯមូលដ្ឋានទ័ពជើងទឹករបស់សហរដ្ឋអាមេរិក នៅឯមន្ទីរឃុំឃាំង Guantanamo Bay ប្រទេសគុយបា អស់រយៈពេលជាច្រើនឆ្នាំ ដោយមិនមានការកាត់ក្តី។

ព័ត៌មានលម្អិតនៃកិច្ចព្រមព្រៀងនេះ មិនត្រូវបានប្រកាសនោះទេ ប៉ុន្តែសារព័ត៌មាន នៅសហរដ្ឋអាមេរិក បានឲ្យដឹងថា ពួកគេទាំង ៣នាក់ នឹងផ្ដល់ចម្លើយពីភាពមានទោស ជាថ្នូរនឹងការកាត់ទោសដែលព្រមព្រៀងគ្នាមិនស្វែងរកការផ្ដន្ទាទោសប្រហារជីវិត។

សូមរំលឹកថា មនុស្សជិត ៣.០០០នាក់ នៅក្នុងទីក្រុងញូវយ៉ក រដ្ឋ Virginia និងរដ្ឋ Pennsylvania បានបាត់បង់ជីវិត នៅក្នុងការវាយប្រហារដោយការបើកយន្តហោះបុកអាគារពាណិជ្ជកម្មពិភពលោក ដែលបន្ទាប់មក បានបង្កមាន «សង្រ្គាមប្រឆាំងភេរវកម្ម» និងការលុកលុយប្រទេសអាហ្វហ្គានីស្ថាន និងអ៊ីរ៉ាក់។

យ៉ាងណាក្ដី ពាក់ព័ន្ធនឹងការព្រមព្រៀងផ្ដល់ចម្លើយនេះ លោក Brett Eagleson ប្រធានអង្គការស្វែងរកយុត្តិធម៌ ១១ កញ្ញា ដែលជាអង្គការតំណាងឲ្យអ្នករួចជីវិត និងសាច់ញាតិរបស់ជនរងគ្រោះ បានឲ្យដឹងនៅក្នុងសេចក្តីថ្លែងការណ៍មួយដែលបានផ្តល់ឲ្យប្រព័ន្ធផ្សព្វផ្សាយ BBC ថា បណ្ដាក្រុមគ្រួសារទាំងឡាយ មានក្ដីកង្វល់យ៉ាងខ្លាំង «ចំពោះកិច្ចព្រមព្រៀងទាំងនេះ»។

លោកបាននិយាយថា ដំណើរការនេះខ្វះតម្លាភាព ហើយបានជំរុញឲ្យអាជ្ញាធរបន្តស្វែងរកព័ត៌មានបន្ថែមអំពីតួនាទីរបស់អារ៉ាប៊ីសាអ៊ូឌីត ក្នុងការវាយប្រហារនេះ៕