រុស្ស៊ី បានដោះលែងអ្នកសារព័ត៌មានអាមេរិក លោក អ៊ីវ៉ាន់ ជើស្កូវីច (Evan Gershkovich) និងអតីតទ័ពម៉ារីនអាមេរិក លោក ផល វេឡាន (Paul Whelan) កាលពីថ្ងៃព្រហស្បតិ៍ (០១ សីហា) ដែលជាផ្នែកមួយនៃការផ្លាស់ប្តូរអ្នកទោសដ៏ធំបំផុតចាប់តាំងពីការបញ្ចប់សង្គ្រាមត្រជាក់មក។

សេតវិមានបាននិយាយថា សហរដ្ឋអាមេរិកបានចរចាការដោះដូរនោះជាមួយរុស្ស៊ី អាល្លឺម៉ង់ និងប្រទេសបីផ្សេងទៀត។ កិច្ចព្រមព្រៀង ដែលបានចរចាជាសម្ងាត់អស់រយៈពេលជាងមួយឆ្នាំនេះ ពាក់ព័ន្ធនឹងអ្នកទោសចំនួន ២៤នាក់ក្នុងនោះមាន ១៦នាក់ត្រូវប្តូរពីរុស្ស៊ីទៅកាន់លោកខាងលិច ហើយអ្នកទោសចំនួន ៨នាក់ដែលត្រូវបានឃុំខ្លួននៅភាគខាងលិច ត្រូវបានបញ្ជូនទៅរុស្ស៊ីវិញ។

អាល្លឺម៉ង់បានបញ្ជាក់ថា អ្នកទោសទាំងនោះរួមបញ្ចូលទាំងលោក វ៉ាឌីម ក្រាស៊ីកូវ (Vadim Krasikov) ដែលត្រូវបានកាត់ទោសពីបទសម្លាប់អ្នកប្រឆាំងដែលនិរទេសខ្លួនម្នាក់នៅទីក្រុងប៊ែរឡាំង។ ប្រធានាធិបតីអាមេរិក លោក ចូ បៃដិន (Joe Biden) បានសាទរចំពោះកិច្ចព្រមព្រៀងនេះថាជា «សមិទ្ធផលនៃការទូត និងមិត្តភាព» ហើយបានលើកសរសើរបណ្ដាសម្ព័ន្ធមិត្តរបស់ទីក្រុងវ៉ាស៊ីនតោន ចំពោះ «ការសម្រេចចិត្តដ៏ក្លាហាន និងមោះមុត» របស់ពួកគេ។

ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) បានជួបអ្នកទោសដែលត្រឡប់ទៅរុស្ស៊ី វិញនៅអាកាសយានដ្ឋាន បន្ទាប់ពីពួកគេបានចុះចតនៅទីក្រុងមូស្គូ ហើយនិយាយថា ពួកគេនឹងទទួលបានពានរង្វាន់ពីរដ្ឋ ខណៈលោក Biden និងអនុប្រធានាធិបតី លោកស្រី Kamala Harris ទៅសួរសុខទុក្ខអ្នកដែលត្រឡប់មកសហរដ្ឋអាមេរិកវិញនៅថ្ងៃព្រហស្បតិ៍៕