យោងតាមការលើកឡើងរបស់លោក Andrea De Domenico គឺជាប្រធានការិយាល័យអង្គការសហប្រជាជាតិទទួលបន្ទុកការសម្របសម្រួលកិច្ចការមនុស្សធម៌(OCHA)នៅតំបន់កាន់កាប់ប៉ាឡេស្ទីន និយាយថា ក្រសួងសុខាភិបាលតំបន់ហ្កាហ្សា បានបញ្ជាក់អត្តសញ្ញាណសាកសពមនុស្ស ២ម៉ឺននាក់ ក្នុងចំណោមជនប៉ាឡេស្ទីន ៣៩.០០០នាក់ប៉ុណ្ណោះ ដែលត្រូវបានសម្លាប់ នៅតំបន់ហ្កាហ្សា ។

លោក De Domenico និយាយថា ការផ្តល់ព័ត៌មាននេះប្រហែលជាការផ្តល់ព័ត៌មានចុងក្រោយរបស់លោកពីទីក្រុងហ៊្សេរុយសាឡឹម ក្រោយពេលក្រុមអាជ្ញាធរអ៊ីស្រាអែល សម្រេចចិត្តមិនផ្តល់ទិដ្ឋាការឡើងវិញដល់រូបលោក ។

ប្រេសិតពិសេសរបស់ UNរូបនេះ និយាយថា គ្មានហេតុផលផ្លូវការនោះទេ ត្រូវបានផ្តល់សម្រាប់ការសម្រេចចិត្តបែបនេះ ប៉ុន្តែការធ្វើសេចក្តីរាយការណ៍របស់ OCHA ស្តីពីសង្រ្គាមនៅតំបន់ហ្កាហ្សា ស្ថិតនៅក្នុងចំណោមបញ្ហាដែលពួកគេមានគោលដៅលើ ។

បន្ថែមពីលើស្ថានភាពមនុស្សធម៌ដ៏ធ្ងន់ធ្ងរក្នុងតំបន់ហ្កាហ្សា លោក De Domenico និយាយថា ជំងឺស្វិតដៃជើង ត្រូវបានរកឃើញនៅក្នុងសំណាកទឹកស្អុយ បង្ខំឲ្យអង្គការសុខភាពពិភពលោក(WHO) រៀបផែនការសម្រាប់ហានិភ័យនៃការរីករាលដាលឆ្លងជំងឺមួយនេះ ។

ក្រសួងសុខាភិបាលបាននិយាយថា ប៉ុន្មានឆ្នាំបន្ទាប់ពីជំងឺស្វិតដៃជើងត្រូវបានលុបបំបាត់នៅប៉ាឡេស្ទីន មេរោគនេះត្រូវបានរកឃើញម្តងទៀតនៅក្នុងទឹកសំណល់នៅទីក្រុង Khan Younis ភាគខាងត្បូងហ្កាហ្សា និងផ្នែកកណ្តាលនៃតំបន់នេះ ដែលបង្កការគំរាមកំហែងដល់សុខភាពដល់អ្នករស់នៅក្នុងតំបន់ហ្កាហ្សា និងប្រទេសជិតខាង ។

កាលពីពេលថ្មីៗនេះ WHO បានរាយការណ៍ថាអ្នកស្រាវជ្រាវរបស់ខ្លួនបានរកឃើញមេរោគជំងឺស្វិតដៃជើង នៅក្នុងសំណាកទឹកស្អុយចំនួន ៦ទីតាំង ដែលប្រមូលបាននៅក្រុង Khan Younis និងកន្លែងផ្សេងទៀតនៅតំបន់ហ្កាហ្សាស្ទ្រីប ហើយពួកគេមានការព្រួយបារម្ភយ៉ាងខ្លាំងចំពោះស្ថានភាពមួយនេះ ៕