អ៊ុយក្រែន បាននិយាយកាលពីថ្ងៃសុក្រថា ការវាយលុកយ៉ាងខ្លាំងរបស់រុស្ស៊ី កំពុងបង្កើនសម្ពាធរុលទៅរកមជ្ឈមណ្ឌលដឹកជញ្ជូនយុទ្ធសាស្ត្រនៅភាគខាងកើតទីក្រុង Pokrovsk ខណៈការជម្លៀសជនស៊ីវិល បានបន្តឆ្លងកាត់ទីក្រុង ធ្វើដំណើរពីតំបន់ដែលត្រូវបានបំផ្លាញ។

កងកម្លាំងរបស់ទីក្រុងមូស្គូ បាននិងកំពុងបន្តរុលទៅមុខជាបន្តបន្ទាប់នៅលើសមរភូមិជាច្រើនកន្លែង នៅក្នុងតំបន់ Donetsk ភាគខាងកើត ដោយចាប់ផ្តើមការវាយប្រហារយ៉ាងខ្លាំងក្លានៅជិតក្រុង Pokrovsk ជាមួយនឹងកងទ័ពរបស់ទីក្រុងគីវ រយៈពេល២៩ខែមកហើយ ចាប់តាំងពីការវាយលុកពេញលេញរបស់រុស្ស៊ី។

លោក Roman Buhayov អ្នកបើកបររថយន្តក្រុងដឹកអ្នកជម្លៀសខ្លួន មកពីអង្គការមនុស្សធម៌ East SOS បានប្រាប់សារព័ត៌មានរ៉យទ័រថា ចំនួននៃការស្នើសុំជម្លៀសនៅក្នុងតំបន់នេះ បានកើនឡើងប្រហែលដប់ដង ក្នុងរយៈពេលពីរសប្តាហ៍កន្លងទៅនេះ។

កាលពីថ្ងៃសុក្រ លោកបានបើករថយន្តក្រុងជម្លៀសអ្នកស្រុកពីទីក្រុង Novohrodivka ជាទីក្រុងដែលមានប្រជាជននៅមុនសង្គ្រាមប្រហែល ១៤.០០០នាក់នៅជិតក្រុង Pokrovsk ។ បច្ចុប្បន្ននេះ វាស្ថិតនៅចម្ងាយប្រហែល៥ គីឡូម៉ែត្រពីសមរភូមិ។

នាង Liubov Hrytsenko រួមជាមួយអ្នកជិតខាង និងកូនប្រុសពិការរបស់អ្នកជិតខាង បានជម្លៀសចេញពីលំនៅឋានរបស់ពួកគេដោយជិះរថយន្តក្រុងរបស់លោក Buhayov ទៅកាន់ក្រុង Pokrovsk ជាកន្លែងដែលនាង បាននិយាយទៅកាន់សារព័ត៌មាន Reuters ។

ពួកគេបានមកដល់ទីក្រុង ដោយមានទ្រព្យសម្បត្ដិ កាត់បន្ថយមកត្រឹមតែថង់ដែលធ្លាប់តែយួរទៅផ្សារ មុនពេលបន្តដំណើររបស់ពួកគេទៅកាន់ទីក្រុង Mykolaiv ភាគខាងត្បូង។