ប្រទេសអូស្ត្រាលី នៅថ្ងៃចន្ទ (០៥ សីហា) នេះបានបង្កើនកម្រិតការគំរាមកំហែងភេរវកម្មរបស់ខ្លួនទៅជា «កម្រិតប្រហែល» ពី «កម្រិតអាចទៅរួច» ដោយលើកឡើងពីកំណើនទស្សនៈជ្រុលនិយមនៅក្នុងប្រទេស ដែលនាំឱ្យមានឱកាសច្រើនជាង ៥០ភាគរយនៃផែនការវាយប្រហារក្នុងរយៈពេល ១២ខែបន្ទាប់។

នាយករដ្ឋមន្ត្រីអូស្ត្រាលី លោក អាន់ថូនី អាល់បានីស (Anthony Albanese) បាននិយាយថា លោកបានបង្កើនកម្រិតគំរាមកំហែងនេះបន្ទាប់ពីការណែនាំពីសេវាសន្តិសុខ ប៉ុន្តែក៏បាននិយាយថា មិនមានការគំរាមកំហែងនៃការវាយប្រហារណាមួយដែលជិតមកដល់នោះទេ។ អូស្ត្រាលី បានមើលឃើញការវាយប្រហារដ៏ហិង្សាជាច្រើនក្នុងពេលប៉ុន្មានខែថ្មីៗនេះ ដែលខ្លះត្រូវបានចាត់ទុកថាជាការជំរុញដោយក្រុមជ្រុលនិយម។

លោក Albanese បានប្រាប់សន្និសីទសារព័ត៌មានថា «ការណែនាំដែលយើងបានទទួលគឺថាប្រជាជនអូស្ត្រាលីកាន់តែច្រើនកំពុងទទួលយកនូវគំនិតជ្រុលនិយម ហើយវាជាទំនួលខុសត្រូវរបស់រដ្ឋាភិបាលក្នុងការប្រុងប្រយ័ត្ន»។ អូស្ត្រាលី បានបន្ទាបការគំរាមកំហែងមកនៅត្រឹម «កម្រិតអាចទៅរួច» ក្នុងឆ្នាំ២០២២ បន្ទាប់ពីដាក់នៅ «កម្រិតប្រហែល» អស់ពេល ៨ឆ្នាំ។

អគ្គនាយកនៃអង្គការស៊ើបការណ៍សន្តិសុខអូស្ត្រាលី ដែលជាទីភ្នាក់ងារចារកម្មសំខាន់របស់ប្រទេសបាននិយាយថា ភាពតានតឹងនៅមជ្ឈិមបូព៌ា រួមទាំងជម្លោះរវាងអ៊ីស្រាអែល និងក្រុមហាម៉ាស ដែលបានចាប់ផ្តើមកាលពីថ្ងៃទី០៧ ខែតុលា គឺជាកត្តារួមចំណែកដល់ការបង្កើនកម្រិតគំរាមកំហែងនេះ៕