អាជ្ញាធរនៅក្នុងរដ្ឋ Kerala របស់ប្រទេសឥណ្ឌា បានរៀបចំពិធីបញ្ចុះសព សម្រាប់សាកសពដែលពុំបានកំណត់អត្តសញ្ញាណកាលពីថ្ងៃអាទិត្យ បន្ទាប់ពីបំណាក់ដីដ៏ខ្លាំង នៅក្នុងស្រុក Wayanad បណ្តាលឲ្យមនុស្សជាង២០០នាក់ស្លាប់។

ភ្លៀងធ្លាក់ខ្លាំង នៅក្នុងតំបន់ បានបង្កឱ្យមានបំណាក់ដី កាលពីព្រឹកថ្ងៃអង្គារ ទី៣០ ខែកក្កដា ដោយដីល្បប់ បានហូរធ្លាក់កប់មនុស្ស នៅពេលពួកគេកំពុងដេកលង់លក់។

អ្នកជំនាញបាននិយាយថា តំបន់នេះ បានទទួលទឹកភ្លៀងឥតឈប់ឈរ ក្នុងរយៈពេលពីរសប្តាហ៍កន្លងទៅនេះ ដែលធ្វើឲ្យដីទន់ជ្រាយ មុនពេលមានភ្លៀងធ្លាក់ខ្លាំងបន្ថែមទៀត បង្កឱ្យមានបំណាក់ដី។

អាជ្ញាធររដ្ឋ លោក Pinarayi Vijayan បាននិយាយថា មនុស្សយ៉ាងហោចណាស់ ២១៥ នាក់ បានស្លាប់នៅក្នុងគ្រោះមហន្តរាយនេះ រួមមានបុរស ៩៨ នាក់ ស្ត្រី ៨៧ នាក់ និងកុមារ ៣០ នាក់ ។

អាជ្ញាធរ និយាយថា គ្រោះមហន្តរាយនេះ គឺមហន្តរាយដ៏អាក្រក់បំផុតនៅក្នុងរដ្ឋ Kerala ចាប់តាំងពីទឹកជំនន់បណ្តាលឲ្យមានមនុស្សស្លាប់២០៥នាក់ និងជិត២០០នាក់នៅបាត់ខ្លួន កាលពីឆ្នាំ២០១៨។