ប្រទេសឥណ្ឌាបានបង្កើនសន្តិសុខនៅឯស្ថានទូតបង់ក្លាដែស ក្នុងទីក្រុងញូវដេលី នាថ្ងៃចន្ទ (ទី៥ ខែសីហា) នេះ បន្ទាប់ពីនាយករដ្ឋមន្រ្តីរបស់ប្រទេសនេះ គឺលោកស្រី Sheikh Hasina បានលាលែងពីតំណែង ហើយបានភៀសខ្លួនចេញពីប្រទេស ខណៈដែលមានមនុស្សស្លាប់កាន់តែច្រើន នៅក្នុងអំពើហិង្សាមួយ ក្នុងចំណោមអំពើហិង្សាដ៏អាក្រក់បំផុតមួយចំនួន គិតចាប់តាំងពីប្រទេសអាស៊ីខាងត្បូងមួយនេះទទួលបានឯករាជ្យ កាលពីជាង ៥ទសវត្សរ៍មុន។

គួរបញ្ជាក់ថា អគ្គមេបញ្ជាការកងទ័ព លោកឧត្តមសេនីយ៍ Waker-Uz-Zaman បានប្រកាសពីលាលែងពីតំណែងរបស់លោកស្រី Hasina នៅក្នុងសុន្ទរកថាតាមទូរទស្សន៍ទៅកាន់ប្រជាជាតិ ហើយបាននិយាយថា រដ្ឋាភិបាលបណ្តោះអាសន្នមួយនឹងត្រូវបានបង្កើតឡើង។

គេឃើញបុគ្គលិកសន្តិសុខជាច្រើននាក់ឈរនៅពីក្រោយរបាំងការពារ នៅឯស្ថានទូតដែលមានទីតាំងនៅកណ្តាលរដ្ឋធានីនៃប្រទេសឥណ្ឌា។

ប្រទេសបង់ក្លាដែសត្រូវបានរួបរឹតដោយការតវ៉ា និងអំពើហិង្សា បន្ទាប់ពីមានការតវ៉ារបស់និស្សិត កាលពីខែមុន ប្រឆាំងនឹងកូតាបម្រុងទុកការងារក្នុងជួររដ្ឋាភិបាល ដោយការតវ៉ានោះ បានប្រែក្លាយទៅជាយុទ្ធនាការទម្លាក់អំណាចរបស់លោកស្រី Hasina ដែលបានឈ្នះអាណត្តិទី៤ ជាប់គ្នា ក្នុងខែមករានៅក្នុងការបោះឆ្នោតដែលត្រូវបានធ្វើពហិការដោយក្រុមប្រឆាំង។

មនុស្សប្រហែល ២៥០នាក់ បានបាត់បង់ជីវិត និងរាប់ពាន់នាក់ទៀតរងរបួស នៅក្នុងអំពើហិង្សានេះ។ សកម្មជននិស្សិតបានអំពាវនាវឲ្យមានការហែក្បួនទៅកាន់រដ្ឋធានី Dhaka នៅថ្ងៃចន្ទនេះ ដែលជាការប្រឆាំងនឹងបម្រាមគោចរទូទាំងប្រទេស ដើម្បីដាក់សម្ពាធឲ្យលោកស្រី Hasina លាលែងពីតំណែង ពោលគឺមានរយៈមួយថ្ងៃបន្ទាប់ពីការប៉ះទង្គិចគ្នាយ៉ាងធ្ងន់ធ្ងរ នៅទូទាំងប្រទេស បានបណ្ដាលឲ្យមនុស្សជិត ១០០នាក់ ស្លាប់។ ចំណែកអ្នកស្លាប់នៅក្នុងការតវ៉ា កាលពីខែមុន មានចំនួនប្រហែល ១៥០នាក់៕