បុគ្គលិកកងទ័ពប្រទេសឥណ្ឌា និងរថយន្តសន្តិសុខ ត្រូវបានគេសង្កេតឃើញនៅប៉ុស្តិ៍ត្រួតពិនិត្យ Fulbari ក្នុងទីក្រុងចាផៃហ្គូរី(Jalpaiguri) រដ្ឋ West Bengal កាលពីថ្ងៃចន្ទ។

ប្រទេសឥណ្ឌា បានបង្កើនសន្តិសុខនៅព្រំដែនជាមួយប្រទេសបង់ក្លាដែស បន្ទាប់ពីការលាលែងពីតំណែង និងការចាកចេញពីប្រទេសរបស់នាយករដ្ឋមន្ត្រីបង់ក្លាដែស លោកស្រី Sheikh Hasina ក្នុងពេលមានចលាចលនយោបាយកើនឡើង។

កងកម្លាំងឥណ្ឌា ត្រូវបានដាក់ពង្រាយនៅប៉ុស្តិ៍ត្រួតពិនិត្យ Fulbari នៃរដ្ឋ West Bengal ខណៈភាពតានតឹងនៅតែបន្ត។

លោកស្រី Hasina បានលាលែងពីតំណែង ហើយបានភៀសខ្លួនចេញពីប្រទេសកាលពីថ្ងៃចន្ទ បន្ទាប់ពីមនុស្សរាប់រយនាក់ត្រូវបានសម្លាប់នៅក្នុងការបង្រ្កាបលើបាតុកម្ម ដែលបានចាប់ផ្តើម ខណៈការតវ៉ាប្រឆាំងទៅនឹងប្រព័ន្ធកូតាការងារ និងបានក្លាយទៅជាចលនាទាមទារឱ្យលោកស្រីលាចេញពីតំណែង។

នាយករដ្ឋមន្ត្រីឥណ្ឌា លោក Narendra Modi កាលពីថ្ងៃចន្ទ បានដឹកនាំកិច្ចប្រជុំមួយជាមួយគណៈរដ្ឋមន្ត្រី ស្តីពីសន្តិសុខនៅទីក្រុង New Delhi ជុំវិញភាពចលាចលស៊ីវិលនៅក្នុងប្រទេសបង់ក្លាដែស។

កិច្ចប្រជុំនេះ មានរដ្ឋមន្ត្រីសំខាន់ៗរបស់រដ្ឋាភិបាលសហព័ន្ធ រួមមានរដ្ឋមន្ត្រីការបរទេស រដ្ឋមន្ត្រីក្រសួងមហាផ្ទៃ និងរដ្ឋមន្ត្រីក្រសួងការពារជាតិ របស់ប្រទេសឥណ្ឌា។