​អាមេរិក៖ រដ្ឋបាល​របស់​លោក​ប្រធានាធិបតី Joe Biden ប្រឈម​នឹង​សម្ពាធ​កាន់តែខ្លាំង​កាល​ពី​ថ្ងៃ​ចន្ទ​ទី​៦ ខែ​កញ្ញា ​ស្រប​ពេល​មាន​របាយការណ៍​ថា ​មនុស្ស​រាប់រយ​នាក់​រួមទាំង​ជនជាតិ​អាមេរិក​ត្រូវ​បាន​រារាំង​អស់​មួយ​សប្ដាហ៍​ មិន​ឱ្យ​ហោះហើរ​ចេញពី​អាកាសយានដ្ឋាន​នៅ​អា​ហ្វ​ហ្គា​នី​ស្ថាន​ភាគ​ខាងជើង​។

​លោកស្រី Marina LeGree ​ស្ថាបនិក​ និង​ជា​នាយក​ប្រតិបត្តិ​នៃ​អង្គការក្រៅរដ្ឋាភិបាល​អាមេរិក​តូច​មួយ​ ដែល​ធ្វើ​សកម្មភាព​យ៉ាងសកម្ម​នៅ​អា​ហ្វ​ហ្គា​នី​ស្ថាន​បាន​និយាយ​ថា​ មនុស្ស​ប្រហែល​ពី ៦០០ ទៅ ១៣០០​នាក់​រួម​ទាំង​ក្មេង​ស្រី​មកពី​ក្រុម​របស់​លោកស្រី​ផង បាន​រង់ចាំ​នៅ​ជិត​ព្រលានយន្តហោះ Mazar-i-Sharif អស់​រយៈពេល​មួយ​សប្តាហ៍​មក​ហើយ ខណៈ​មានការ​ភាន់ច្រឡំ​ពាក់ព័ន្ធ​នឹង​ក្រុម​តា​លី​បង់ និង​មន្ត្រី​អាមេរិក​។​ ​លោកស្រី​និយាយ​ថា ចំនួន​នេះ​ត្រូវ​បាន​គេ​យល់ថា​រួម​ទាំង​ជនជាតិ​អាមេរិក​ចំនួន ១៩​នាក់ ទោះបីជា​មិន​មាន​ក្រុម​របស់​លោកស្រី​ LeGree ក៏ដោយ​។ លោកស្រី​បាន​និយាយ​ថា ​អ្នក​ដែល​រង់ចាំ​កំពុង​ស្នាក់​នៅ​ក្នុង​ផ្ទះ​នៅ​កន្លែង​ផ្សេងៗ​គ្នា​នៅ​ក្នុង​ទីក្រុង​នេះ​។​

​លោកស្រី LeGree បាន​ប្រាប់​សារព័ត៌មាន AFP ថា​ “វា​មាន​រយៈពេល​ ៧​ថ្ងៃ​ហើយ គ្មាន​អ្វី​ប្រែប្រួល​ទេ ដោយ​បន្ថែម​ថា​ យន្តហោះ​ជើង​ហោះហើរ​ពិសេស​ចំនួន ៦​គ្រឿង​កំពុង​រង់ចាំ​នៅ​អាកាសយានដ្ឋាន​ដើម្បី​ជម្លៀស​ចេញពី​អ្វី​ដែល​មន្ត្រី​ខ្លះ​ហៅថា​ជា​ “ក្រុម​អង្គការក្រៅរដ្ឋាភិបាល​”៕

អត្ថបទ៖ សុខមាន