រដ្ឋមន្ត្រីការពារជាតិកូឡុំប៊ី លោក Ivan Velasquez កាលពីថ្ងៃចន្ទ (ទី៥ ខែសីហា) បាននិយាយថា កងកម្លាំងប្រដាប់អាវុធរបស់ប្រទេសកូឡុំប៊ី បានចាប់ផ្តើមប្រតិបត្តិការឡើងវិញប្រឆាំងនឹងក្រុមឧទ្ទាមឆ្វេងនិយម គឺកងទ័ពរំដោះជាតិ (ELN) ដោយការសម្រេចនេះ កើតឡើងបន្ទាប់ពីបទឈប់បាញ់រយៈពេល ៦ខែ រវាងភាគីទាំង២ បានបញ្ចប់កាលពីថ្ងៃសៅរ៍ចុងសប្ដាហ៍កន្លងមក។

រដ្ឋាភិបាលរបស់ប្រធានាធិបតី លោក Gustavo Petro ដែលជាមេដឹកនាំឆ្វេងនិយមដំបូងរបស់ប្រទេសកូឡុំប៊ី បានចាប់ផ្តើមកិច្ចចរចាសន្តិភាពឡើងវិញជាមួយក្រុម ELN កាលពីចុងឆ្នាំ២០២២ ជាផ្នែកនៃគោលនយោបាយសន្តិភាពពេញលេញ ពោលគឺជាអ្វីដែលរដ្ឋាភិបាលកំពុងស្វែងរកការបញ្ចប់ជម្លោះរយៈពេល ៦ទសវត្សរ៍របស់ប្រទេស ដែលបានបណ្ដាលឲ្យមនុស្សជាង ៤៥០.០០០នាក់ បាត់បង់ជីវិត។

ការចរចាសន្តិភាពបានជាប់គាំងក្នុងរយៈពេលប៉ុន្មានខែថ្មីៗនេះ ហើយក្រុម ELN បានចាប់ផ្ដើមដំណើរការចាប់ជំរិតឡើងវិញ ដែលប្រភពសន្តិសុខនិយាយថា សកម្មភាពនេះផ្តល់ឲ្យក្រុមនេះនូវហិរញ្ញប្បទានដែលពួកគេត្រូវការជាច្រើន ដោយវាបង្ហាញឲ្យឃើញពីការវិលត្រឡប់មកវិញនូវទិដ្ឋភាពដ៏គួរឲ្យភ័យខ្លាចបំផុតនៃជម្លោះរបស់ប្រទេសកូឡុំប៊ី។

ការចរចា រវាងរដ្ឋាភិបាលមុនៗ ជាមួយកក្រុម ELN ដែលសហរដ្ឋអាមេរិក និងសហភាពអឺរ៉ុប ចាត់ទុកថា ជាអង្គការភេរវករនោះ បានបរាជ័យដោយសារតែទស្សនៈជ្រុលនិយមរបស់ក្រុមនេះ ការបែកខ្ញែកនៃខ្សែច្រវាក់បញ្ជា និងការមិនចុះសម្រុងគ្នា ក្នុងជួររបស់ក្រុមនេះ៕