មេដឹកនាំកោះតៃវ៉ាន់ លោក ឡៃ ឆឹងទ័រ (Lai Ching-te) បាននិយាយកាលពីថ្ងៃអង្គារ (០៦ សីហា) ថា ថវិកាការពារជាតិសរុបរបស់កោះតៃវ៉ាន់ ត្រូវបានកំណត់ថានឹងកើនឡើងដល់កម្រិតខ្ពស់ថ្មីចំនួន ៦៤៧ពាន់លានដុល្លារតៃវ៉ាន់ (១៩,៧៤ ពាន់លានដុល្លារអាមេរិក) នៅឆ្នាំ២០២៥ ខណៈកោះនេះស្វះស្វែងជំរុញការការពារខ្លួន និងកិច្ចសហប្រតិបត្តិការជាមួយបណ្ដាដៃគូប្រជាធិបតេយ្យ។

ប្រទេសចិន ដែលចាត់ទុកកោះស្វ័យគ្រប់គ្រងតៃវ៉ាន់ជាទឹកដីរបស់ខ្លួន បានបង្កើនសម្ពាធផ្នែកយោធា និងនយោបាយក្នុងរយៈពេលប៉ុន្មានឆ្នាំចុងក្រោយនេះ ដើម្បីបញ្ជាក់ការអះអាងទាំងនោះ ដែលទីក្រុងតៃប៉ិ បដិសេធយ៉ាងខ្លាំង។

លោក Lai ត្រូវបានដកស្រង់សម្តីដែលនិយាយនៅក្នុងសេចក្តីថ្លែងការណ៍មួយថា «យើងប្តេជ្ញាចិត្តក្នុងការជំរុញការការពារខ្លួន និងធ្វើឱ្យកិច្ចសហប្រតិបត្តិការស៊ីជម្រៅជាមួយដៃគូប្រជាធិបតេយ្យក្នុងគោលបំណងធានាសន្តិភាព និងវិបុលភាពសម្រាប់កោះតៃវ៉ាន់»។ សេចក្តីថ្លែងការណ៍នោះមិនបានផ្តល់តួលេខលម្អិតនូវការប្រៀបធៀបទៅនឹងថវិកាការពារជាតិសម្រាប់ឆ្នាំនេះទេ។ សូមបញ្ជាក់ថា រដ្ឋាភិបាលកោះតៃវ៉ាន់ បានស្នើការចំណាយលើវិស័យការពារជាតិសរុបចំនួន ៦០៦,៨ពាន់លានដុល្លារតៃវ៉ាន់ សម្រាប់ឆ្នាំ២០២៤។

លោក Lai បានប្រឈមមុខនឹងការវាយប្រហារវោហារសាស្រ្តពីប្រទេសចិន ចាប់តាំងពីចូលកាន់តំណែងក្នុងខែឧសភា ដោយទីក្រុងប៉េកាំង បានហៅលោកថាជា «ជនផ្ដាច់ខ្លួនដ៏គ្រោះថ្នាក់» ហើយចិន ក៏បានរៀបចំហ្គេមសង្រ្គាម (សមយុទ្ធ) ជុំវិញកោះតៃវ៉ាន់ភ្លាមៗបន្ទាប់ពីការចូលកាន់តំណែងរបស់មេដឹកនាំកោះតៃវ៉ាន់រូបនេះផងដែរ៕