ប្រទេសបង់ក្លាដែស នឹងកំណត់ពេលទទួលបានរដ្ឋាភិបាលបណ្តោះអាសន្នថ្មី ដឹកនាំដោយសេដ្ឋវិទូដែលឈ្នះរង្វាន់ណូបែលសន្តិភាព លោក Muhammad Yunus នៅថ្ងៃព្រហស្បតិ៍នេះ បន្ទាប់ពីមានការតវ៉ារបស់និស្សិតជាច្រើនសប្តាហ៍ដែលបានបង្ខំឱ្យនាយករដ្ឋមន្ត្រី លោកស្រី Sheikh Hasina លាលែងពីតំណែង ហើយបានភៀសខ្លួនទៅកាន់ប្រទេសឥណ្ឌា។

លោក Muhammad Yunus ជាអ្នកដែលគ្រោងនឹងដឹកនាំរដ្ឋាភិបាលចាំផ្ទះបន្ទាប់ពីការតវ៉ាទ្រង់ទ្រាយធំ កាលពីថ្ងៃពុធ បានអំពាវនាវឱ្យប្រជាជន «ត្រៀមខ្លួនដើម្បីកសាងប្រទេស» មុនពេលការវិលត្រឡប់របស់លោកដែលត្រូវបានរំពឹងទុកយ៉ាងទូលំទូលាយ។

ការិយាល័យប្រធានាធិបតី និយាយថា អ្នកត្រួសត្រាយផ្នែកមីក្រូហិរញ្ញវត្ថុដែលឈ្នះរង្វាន់ណូបែល នឹងដឹកនាំរដ្ឋាភិបាលបណ្តោះអាសន្ន ជាប្រធានទីប្រឹក្សា។

លោក Yunus បាននិយាយកាលពីថ្ងៃពុធ ក្នុងសេចក្តីថ្លែងការណ៍ថា «សូមស្ងប់ស្ងាត់ និងត្រៀមខ្លួនដើម្បីកសាងប្រទេស» មួយថ្ងៃមុនការមកដល់ប្រទេស ពីប្រទេសបារាំង ដោយជំរុញឱ្យមានភាពស្ងប់ស្ងាត់ បន្ទាប់ពីមានអំពើហិង្សាច្រើនសប្តាហ៍ បណ្តាលឲ្យមនុស្សយ៉ាងហោចណាស់៤៥៥នាក់ស្លាប់។

លោកបាននិយាយថា «ប្រសិនបើយើងដើរលើផ្លូវនៃអំពើហិង្សា នោះអ្វីៗនឹងត្រូវបានបំផ្លាញ។

ការតែងតាំង បានធ្វើឡើងភ្លាមៗ បន្ទាប់ពីមេដឹកនាំនិស្សិត បានអំពាវនាវឱ្យលោក Yunus អាយុ ៨៤ឆ្នាំ ដែលត្រូវបានផ្តល់កិត្តិយស ដោយសារតែការធ្វើឲ្យប្រជាជនរាប់លាននាក់ ចេញពីភាពក្រីក្រនៅក្នុងប្រទេសអាស៊ីខាងត្បូងមួយនេះ។

ការិយាល័យប្រធានាធិបតី បាននិយាយនៅក្នុងសេចក្តីថ្លែងការណ៍ថា ការសម្រេច ត្រូវបានធ្វើឡើងនៅក្នុងជំនួបជាមួយប្រធានាធិបតី លោក Mohammed Shahabuddin មេបញ្ជាការកងទ័ព កងទ័ពជើងទឹក ទ័ពអាកាស និងអ្នកដឹកនាំនិស្សិត។ មេបញ្ជាការកងទ័ព ឧត្តមសេនីយ៍ Waker-Uz-Zaman បាននិយាយកាលពីថ្ងៃពុធថា លោកសង្ឃឹមថានឹងស្បថចូលកាន់តំណែងក្នុងរដ្ឋាភិបាលបណ្តោះអាសន្ននៅថ្ងៃបន្ទាប់ ហើយលោកបានគាំទ្រ លោក Yunus ។