បាល់ទាត់៖ គណៈកម្មការប្រកួតបាល់ទាត់ជាតិកម្ពុជា (CNCC) បានប្រកាសរូបមន្ដប្រកួតជុំទី២ នៃលីគកំពូលកម្ពុជាឆ្នាំ២០២១ ជាផ្លូវការហើយដោយរក្សាការបែងចែកជាពីរដដែល តែប្លែកពីរដូវកាលមុនបន្ដិចដោយលក្ខខណ្ឌទី១ សម្រាប់ក្រុមមានពិន្ទុខ្ពស់ជាងគេ ៨ក្រុម ឬហៅថា ក្រុម Top-8 ក្រោយបញ្ចប់ជុំទី១ នឹងត្រូវប្រកួតវិលជុំនៅជុំទី២ ដើម្បីប្រជែងឯក ខណៈ ៥ក្រុមមានពិន្ទុតិចជាងគេនឹងត្រូវប្រកួតជម្រុះរកក្រុមត្រូវកាត់ចេញពីលីគឆ្នាំ២០២២។
ការបញ្ជាក់នេះបានធ្វើឡើងក្នុងពិធីចាប់ឆ្នោតត្រៀមប្រកួតជុំទី២ កាលពីថ្ងៃទី៧ ខែកញ្ញានេះ ស្របពេលការប្រកួតជុំទី១ គ្រោងនឹងបញ្ចប់នៅថ្ងៃទី១៥ ខែកញ្ញាខាងមុខ។ ដូច្នេះក្រោយបញ្ចប់ការប្រកួតជុំទី១ សម្រាប់ក្រុមឈរលេខរៀងទី១ ដល់លេខរៀងទី៨ នឹងត្រូវប្រកួតវិលជុំចំនួន ១ជុំទៀត ហើយក្រុមរកបានពិន្ទុខ្ពស់ជាងគេនឹងក្លាយជាជើងឯក។ ចំណែកក្រុមឈរលេខរៀងទី៩ ដល់លេខរៀងទី១៣ នឹងត្រូវប្រកួតវិលជុំចំនួន ១ជុំដូចគ្នា ហើយចុងបញ្ចប់នៃការប្រកួតវិលជុំក្រុមឈរលេខរៀងទី១៣ នឹងត្រូវកាត់ចេញពីលីគរដូវកាលក្រោយ។ គួរដឹងថា ការផ្លាស់ប្ដូររូបមន្ដប្រកួតនៅជុំទី២ នៃលីគកំពូលកម្ពុជាដោយសារវិបត្តិកូវីដ-១៩ ដែលនាំឲ្យការប្រកួតត្រូវបានអូសបន្លាយក្រោយការពន្យារពេលចំនួន ២លើកមិនអាចឲ្យការប្រកួតដំណើរការតាមផែនការបាន។ នេះគឺជាឆ្នាំទី២ ផងដែរ ដែលលីគបានប្ដូររូបមន្ដប្រកួតនៅជុំទី២ បន្ទាប់ពីឆ្នាំ២០២០ ដែល CNCC បានបែងចែកការប្រកួតជាពីរដូចគ្នា តែកំណត់ក្រុមមានពិន្ទុខ្ពស់ជាងគេ ៦ក្រុមដើម្បីប្រកួតវិលជុំដណ្ដើមពាន ផ្ទុយពីរដូវកាលនេះដោយសារគណៈកម្មការ ក៏ដូចជាសហព័ន្ធសម្លឹងឃើញលីគមានការប្រកួតប្រជែងខ្លាំង ក៏សម្រេចកំណត់ក្រុមមានពិន្ទុខ្ពស់ជាងគេ ៨ក្រុមក្នុងចំណោម ១៣ក្រុមដើម្បីប្រកួតវិលជុំដណ្ដើមជើងឯកវិញ។
សូមបញ្ជាក់ថា បច្ចុប្បន្នលីគកំពូលកម្ពុជាទើបដំណើរការប្រកួតបាន ១២សប្ដាហ៍ ខណៈសល់ការប្រកួតមួយសប្ដាហ៍ទៀតទើបបញ្ចប់ការប្រកួតសន្សំពិន្ទុជុំទី១។ ចំពោះលទ្ធផលបណ្ដោះអាសន្ន ក្រុមវិសាខាកំពុងឈរកំពូលតារាងមាន ២៥ពិន្ទុ តាមពីក្រោយដោយក្រុមការពារតំណែងជើងឯកបឹងកេតមាន ២៤ពិន្ទុ ខណៈក្រុមភ្នំពេញក្រោន និងព្រះខ័នរាជស្វាយរៀង ឈរលេខ៣ និងលេខ៤ មាន ២២ពិន្ទុស្មើគ្នា។ រីឯក្រុមអង្គរថាយហ្គឺរឈរលេខ៥ មាន ២១ពិន្ទុ, ក្រុមណាហ្គាវើលដ៏ឈរលេខ៦ មាន ១៩ពិន្ទុ, ក្រុមកងយោធពលខេមរភូមិន្ទឈរលេខ៧ មាន ១៦ពិន្ទុ និងក្រុមគិរីវង់ឈរលេខ៨ មាន ១២ពិន្ទុបណ្ដោះអាសន្ន៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
