អ្នកគាំទ្រគណបក្សប្រឆាំងថៃដែលត្រូវបានរំលាយ បានសន្យាថា នឹងបង្កើតក្រុមថ្មីដើម្បីប្រឆាំងនឹងការក្ដោបក្ដាប់អំណាចរបស់ស្ថាប័នអភិរក្សនិយម ដោយនេះកំណត់នូវដំណាក់កាលនៃភាពចលាចលនយោបាយបន្ថែមទៀត នៅក្នុងប្រទេសសេដ្ឋកិច្ចធំទី២ របស់អាស៊ីអាគ្នេយ៍មួយនេះ។

ក្នុងនាមជាមនុស្សម្នាក់ស្ថិតក្នុងចំណោមនាយកប្រតិបត្តិប្រហែលជា ១២នាក់នៃគណបក្សបោះជំហានទៅមុខ (Move Forward) ដែលតុលាការហាមឃាត់មិនឲ្យធ្វើនយោបាយរយៈពេល ១០ឆ្នាំ លោក Pita Limjaroenrat (ភីថា លឹមចារ៉ើនរ៉ាត់) បាននិយាយថា គណបក្សថ្មីដែលគ្រោងនឹងប្រកាសបង្ហាញនៅថ្ងៃសុក្រ (ទី៩ ខែសីហា) នឹងតស៊ូនៅគ្រប់ការបោះឆ្នោត រហូតទាល់តែអាច «កម្ចាត់ដំណើរវិលចុះឡើងដដែលៗ» នៃការរំលាយគណបក្សនយោបាយដែលត្រូវបានចាត់ទុកថា ជាការគំរាមកំហែងដល់ការបង្កើតស្ថាប័នគាំទ្ររាជានិយម ដោយការតស៊ូនេះគឺដើម្បីសម្រេចឲ្យបាននូវលទ្ធិប្រជាធិបតេយ្យយ៉ាងពិតប្រាកដ ក្នុងប្រទេសថៃ។

ដោយនិយាយទៅកាន់អ្នកគាំទ្ររាប់រយនាក់ដែលបានប្រមូលផ្តុំគ្នា នៅឯការិយាល័យគណបក្ស ក្នុងទីក្រុងបាងកក កាលពីល្ងាចថ្ងៃពុធ (ទី៧ ខែសីហា) ក្រោយការសម្រេចរបស់តុលាការ លោក ភីថា បានប្រាប់ថា៖ «ខ្ញុំយល់ថា អ្នកមានការខកចិត្ត ខឹងសម្បា ឬសោកសៅ។ យើងនឹងមិនទុកឲ្យកំហឹងបំផ្លាញពួកយើងនោះទេ។ យើងនឹងនាំយកអារម្មណ៍ខកចិត្តទាំងអស់ទៅជាមួយ ហើយបញ្ចេញវា នៅតាមការិយាល័យបោះឆ្នោត នៅរាល់ការបោះឆ្នោតនីមួយៗ ចាប់ពីពេលនេះតទៅ»។

គួរបញ្ចាក់ថា នៅក្នុងសេចក្តីសម្រេចដែលត្រូវបានគេរំពឹងទុកយ៉ាងទូលំទូលាយ តុលាការធម្មនុញ្ញរបស់ប្រទេសថៃ បានសម្រេចរំលាយគណបក្សបោះជំហានទៅមុខ ដោយលើកឡើងថា ការសន្យា អំឡុងយុទ្ធនាការបោះឆ្នោតរបស់ខ្លួន ក្នុងការស្វែងរកការកែប្រែច្បាប់ ស្តីពីការប្រមាថដ៏ចម្រូងចម្រាស ដែលការពាររាជវង្សថៃកុំឲ្យមានការរិះគន់នោះ បានបំពានច្បាប់បោះឆ្នោត៕