នគរបាលចក្រភពអង់គ្លេស នៅតែស្ថិតក្នុងការប្រុងប្រយ័ត្នខ្ពស់កាលពីថ្ងៃព្រហស្បតិ៍ (០៨ សីហា) បន្ទាប់ពីវត្តមានសន្តិសុខដ៏ច្រើន ការចាប់ខ្លួនយ៉ាងឆាប់រហ័ស និងការបង្ហាញការរួបរួមដោយប្រជាជននៅទូទាំងចក្រភពអង់គ្លេសកាលពីថ្ងៃពុធ បានរារាំងការកើតឡើងម្តងទៀតនៃកុបកម្មដ៏រីករាលដាល ពាក់ព័ន្ធនឹងការវាយប្រហាររើសអើងប្រកាន់ពូជសាសន៍ដែលផ្តោតលើជនជាតិមូស្លីម និងជនអន្តោប្រវេសន៍។

បន្ទាប់ពីនគរបាលបានដាក់ពង្រាយកម្លាំង ហើយក្រុមបាតុករប្រឆាំងការរើសអើងជាតិសាសន៍រាប់ពាន់នាក់បានចេញតវ៉ាតាមផ្លូវកាលពីល្ងាចថ្ងៃពុធមក ការគំរាមកំហែងនៃការប្រមូលផ្តុំដ៏រីករាលដាលដោយក្រុមប្រឆាំងជនអន្តោប្រវេសន៍ស្តាំនិយមជ្រុលមិនបានសម្រេចនោះទេ។

ប៉ុន្តែរដ្ឋាភិបាលបាននិយាយថា ខ្លួននៅតែមានការប្រុងប្រយ័ត្នខ្ពស់ បន្ទាប់ពីមានកុបកម្មជាច្រើនថ្ងៃដែលបង្កឡើងដោយការបង្ហោះមិនពិតតាមអ៊ីនធឺណិត កំណត់អត្តសញ្ញាណខុសលើជនសង្ស័យដែលជាឃាតករសម្លាប់ក្មេងស្រីបីនាក់ក្នុងការវាយប្រហារដោយកាំបិតកាលពីថ្ងៃទី២៩ ខែកក្កដា។ មនុស្សជាង ៤៨០នាក់ត្រូវបានចាប់ខ្លួននៅទូទាំងប្រទេស រហូតមកដល់ពេលនេះ ជិត ១៥០ត្រូវបានចោទប្រកាន់។ មនុស្សរាប់សិបនាក់ត្រូវបានកាត់ទោសរួចហើយជាមួយនឹងសំណុំរឿងដែលត្រូវបានតាមដានយ៉ាងរហ័សតាមរយៈប្រព័ន្ធយុត្តិធម៌។

ប្រមុខមន្ត្រីនគរបាលជាន់ខ្ពស់របស់អង់គ្លេស ស្នងការក្រុងឡុងដ៍្រ លោក ម៉ាក រ៉ូលី (Mark Rowley) បាននិយាយថា អ្នកដែលត្រូវបានចាប់ខ្លួនជាច្រើននាក់មានប្រវត្តិប្រព្រឹត្តបទឧក្រិដ្ឋ។ សម្រាប់លោកនាយករដ្ឋមន្ត្រី គា ស្តាមើ (Keir Starmer) ដែលជាអតីតប្រធានរដ្ឋអាជ្ញាវិញ នេះគឺជាការសាកល្បងដ៏សំខាន់លើកដំបូងនៃតំណែងនាយករដ្ឋមន្ត្រីរបស់លោក ចាប់តាំងពីការឈ្នះការបោះឆ្នោតកាលពីថ្ងៃទី០៤ ខែកក្កដា ដែលរដ្ឋាភិបាលអភិរក្សនិយមពីមុនបានគូសបញ្ជាក់ថាអន្តោប្រវេសន៍ជាបញ្ហាចម្បង៕