បន្ទាប់ពីបញ្ជាជម្លៀសថ្មីចេញដោយអាជ្ញាធរអ៊ីស្រាអែល ក្រុមមនុស្សធម៌របស់អង្គការសហប្រជាជាតិ បាននិយាយកាលពីថ្ងៃព្រហស្បតិ៍ (០៨ សីហា) ថា ដៃគូរបស់ខ្លួនបានរាយការណ៍ថាប្រជាជននៅតំបន់ហ្កាហ្សា រាប់ពាន់នាក់ទៀតបានភៀសខ្លួនចេញពីផ្នែកខ្លះនៃទីក្រុង ខាន់យូនីស (Khan Younis) ភាគខាងលិចឆ្ពោះទៅកាន់ទីក្រុង អាល់ម៉ាវ៉ាស៊ី (Al Mawasi)។

ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បាននិយាយថា បទបញ្ជានេះប៉ះពាល់ដល់ប្រជាជននៅភាគខាងកើត និងកណ្តាលទីក្រុង Khan Younis និងតំបន់ អាល់សាលកា (Al Salqa) នៃក្រុង ឌើ អាល់បាឡា (Deir al Balah) ជាមួយនឹង «ការប៉ាន់ប្រមាណដំបូងពីដៃគូរបស់ទីភ្នាក់ងារនេះដែលតាមដានចំនួនប្រជាជនកំពុងបម្លាស់ទីនៅក្នុងតំបន់ហ្កាហ្សាបង្ហាញថា មនុស្សច្រើនជាង ១៥.៥០០នាក់ធ្លាប់បានរស់នៅក្នុងតំបន់ដែលត្រូវជម្លៀសទាំងនោះ»។

OCHA បានព្រមានថា ឧបសគ្គលើការផលិតទឹក និងការបូមទឹកស្អុយនៅតំបន់ហ្កាហ្សា បន្តធ្វើឱ្យប្រជាជនប៉ាឡេស្ទីនមានហានិភ័យសុខភាពសំខាន់ៗ។ កង្វះម៉ាស៊ីនភ្លើង និងប្រភពថាមពលជំនួស និងការខ្វះខាតគ្រឿងបន្លាស់សម្រាប់ដំណើរការម៉ាស៊ីនភ្លើងដែលមានស្រាប់ រារាំងដល់កិច្ចខិតខំប្រឹងប្រែងក្នុងការបង្កើនការឆ្លើយតបទឹក ភាពស្អាត និងអនាម័យ។

កម្មវិធីស្បៀងអាហារពិភពលោក (WFP) បានព្រមានថា អរិភាព ផ្លូវថ្នល់ដែលខូចខាត និងកង្វះសណ្តាប់ធ្នាប់ និងសុវត្ថិភាពសាធារណៈ បានរារាំងយ៉ាងធ្ងន់ធ្ងរដល់ប្រតិបត្តិការដឹកជញ្ជូនស្បៀងអាហារនៅក្នុងតំបន់ហ្កាហ្សា ដោយបង្ខំឱ្យកាត់បន្ថយរបបអាហារ។ ទីភ្នាក់ងារនេះនិយាយថា ខណៈពេលដែលខ្លួនបានជួយដល់មនុស្សប្រមាណ ១លាននាក់នៅក្នុងតំបន់ហ្កាហ្សាក្នុងខែកក្កដា ចំណុចចែកចាយស្បៀងអាហារនៅតែបន្តប្រឈមមុខនឹងការរំខានដ៏ធំដោយសារតែជម្លោះ បញ្ជាជម្លៀស និងការខូចខាតហេដ្ឋារចនាសម្ព័ន្ធ៕