រដ្ឋជាសមាជិករបស់អង្គការសហប្រជាជាតិ (UN) កាលពីថ្ងៃព្រហស្បតិ៍ (ទី៨ ខែសីហា) បានអនុម័តសន្ធិសញ្ញាមួយផ្ដោតលើការប្រយុទ្ធប្រឆាំងឧក្រិដ្ឋកម្មតាមប្រព័ន្ធអ៊ីនធឺណិត ដែលជាកិច្ចព្រមព្រៀងបែបនេះដំបូងរបស់ស្ថាប័ន បើទោះបីជាមានការប្រឆាំងយ៉ាងខ្លាំងក្លាពីសកម្មជនសិទ្ធិមនុស្ស ដែលបានព្រមានអំពីគ្រោះថ្នាក់នៃតាមការឃ្លាំមើលនាពេលខាងមុខក៏ដោយ។

បន្ទាប់ពីមានការចរចារយៈពេល ៣ឆ្នាំ និងកិច្ចប្រជុំចុងក្រោយរយៈពេល ២សប្តាហ៍ នៅទីក្រុងញូវយ៉ក សហរដ្ឋអាមេរិក សមាជិកបានអនុម័តអនុសញ្ញាអង្គការសហប្រជាជាតិ ប្រឆាំងនឹងឧក្រិដ្ឋកម្មតាមអ៊ីនធឺណិតដោយឯកច្ឆន្ទ ហើយឥឡូវនេះ ច្បាប់នេះនឹងត្រូវបានដាក់ជូនមហាសន្និបាត ដើម្បីអនុម័តជាផ្លូវការ។

អ្នកការទូតអាល់ហ្សេរី លោកស្រី Faouzia Boumaiza Mebarki ប្រធានគណៈកម្មាធិការតាក់តែងសន្ធិសញ្ញា បាននិយាយអបអរថា៖ «ខ្ញុំពិចារណាលើឯកសារទាំងនេះ ពេលនេះត្រូវបានអនុម័តហើយ។ សូមអរគុណយ៉ាងខ្លាំងចំពោះអ្នកទាំងអស់គ្នា!»។

គួរបញ្ជាក់ថា គណៈកម្មាធិការនេះត្រូវបានបង្កើតឡើង ទោះបីជាមានការប្រឆាំងពីសហរដ្ឋអាមេរិក និងអឺរ៉ុបក៏ដោយ បន្ទាប់ពីមានចំណាត់ដំបូង ដោយប្រទេសរុស្ស៊ី កាលពីឆ្នាំ២០១៧។

សន្ធិសញ្ញាថ្មីនេះ នឹងចូលជាធរមាន នៅពេលដែលត្រូវបានផ្តល់សច្ចាប័នដោយប្រទេសជាសមាជិកចំនួន ៤០ ហើយវាត្រូវបានបង្កើតឡើង ក្នុងគោលបំណង «ទប់ស្កាត់ និងប្រយុទ្ធប្រឆាំងជាមួយឧក្រិដ្ឋកម្មតាមអ៊ីនធឺណិតឲ្យកាន់តែមានភាពល្អប្រសើរ និងប្រសិទ្ធភាព» ជាពិសេសទាក់ទងនឹងរូបភាពការរំលោភបំពានផ្លូវភេទលើកុមារ និងសម្អាតលុយកខ្វក់៕