អគ្គលេខាធិការគណបក្សរបស់លោក Carles Puigdemont នៅថ្ងៃសុក្រ (ទី៩ ខែសីហា) បាននិយាយថា មេដឹកនាំផ្តាច់ខ្លួនតំបន់កាតាឡាន់រូបនេះ កំពុងធ្វើដំណើរទៅកាន់ប្រទេសបែលហ្ស៊ិកវិញថ្ងៃសុក្រនេះ បន្ទាប់ពីបានបង្ហាញវត្តមាននៅឯការជួបជុំមួយ នាកណ្តាលទីក្រុង Barcelona ទោះបីជាមានដីកាឲ្យចាប់ខ្លួន នៅក្នុងប្រទេសអេស្ប៉ាញក៏ដោយ ។

លោក Jordi Turull បានប្រាប់វិទ្យុ RAC1 ថា លោកមិនដឹងនោះទេថា តើលោក Puigdemont បានទៅដល់គេហដ្ឋានរបស់លោកហើយ ឬនៅ នាទីក្រុង Waterloo ជាកន្លែងដែលលោកបានរស់នៅអស់រយៈពេល ៧ឆ្នាំ ដែលជាការនិរទេសខ្លួនឯងដោយបង្ខំ គិតចាប់តាំងពីបរាជ័យ ក្នុងការដឹកនាំការប៉ុនប៉ងផ្តាច់ខ្លួនរបស់តំបន់កាតាឡាន់ ក្នុងឆ្នាំ២០១៧។

លោកគឺជាជន ដែលគេត្រូវការចាប់ខ្លួននៅអេស្ប៉ាញពីបទសង្ស័យពីប្រព្រឹត្តទុច្ចរិត ទាក់ទងនឹងប្រជាមតិឯករាជ្យឆ្នាំ២០១៧ ដែលតុលាការអេស្ប៉ាញសម្រេចថា ខុសច្បាប់។ លោក Puigdemont និយាយថា ការបោះឆ្នោតប្រជាមតិ គឺស្របច្បាប់ ដូច្នេះហើយការចោទប្រកាន់ដែលទាក់ទងនឹងករណីនេះ គ្មានមូលដ្ឋានច្បាប់នោះទេ។

លោក Turull បាននិយាយថា ដំបូងឡើយ លោក Puigdemont មានគម្រោងចូលរួមការបោះឆ្នោតប្រគល់អំណាច នៅក្នុងសភាប្រចាំតំបន់ ដើម្បីជ្រើសរើសមេដឹកនាំថ្មីរបស់តំបន់កាតាឡាន់។

លោក Turull បាននិយាយថា តែជំនួសឲ្យការដើរចេញពីកន្លែងជួបជុំទៅកាន់សភា លោក Puigdemont បានចូលទៅក្នុងឡាន ដោយសារតែព្រួយបារម្ភអំពីសុវត្ថិភាព ហើយបន្ទាប់មកបានសម្រេចចិត្តចាកចេញភ្លាមៗ ព្រោះលោកជឿថា គេនឹងមិនអនុញ្ញាតឲ្យលោកចូលទៅក្នុងសភានោះទេ៕