ការិយាល័យសារព័ត៌មានរបស់កងកម្លាំងការពារអ៊ីស្រាអែល (IDF) បាននិយាយនៅក្នុងសេចក្តីថ្លែងការណ៍មួយកាលពីថ្ងៃសុក្រថា កងកម្លាំងទ័ពអាកាសរបស់អ៊ីស្រាអែល បានវាយប្រហារលើគោលដៅប្រហែល ៦០កន្លែងរបស់ក្រុមសកម្មប្រយុទ្ធ នៅទូទាំងតំបន់ហ្កាហ្សាស្ទ្រីបក្នុងរយៈពេល ២៤ ម៉ោងកន្លងទៅនេះ។

សេវាសារព័ត៌មានរបស់ IDF បានរាយការណ៍ថា ក្នុងចំណោមគោលដៅគឺ «បន្ទាយយោធាដែលប្រតិបត្តិការដោយភេរវករ» ក៏ដូចជា «កន្លែងរបស់ក្រុមភេរវករ» និងឃ្លាំងអាវុធ។

ការិយាល័យសារព័ត៌មាន បានបន្ថែមថា ជាងនេះទៅទៀត កងកម្លាំងជើងគោកអ៊ីស្រាអែល បានបន្តប្រតិបត្តិការរបស់ខ្លួននៅក្នុងតំបន់នៃទីប្រជុំជន Rafah នៅភាគខាងត្បូងនៃតំបន់ហ្កាហ្សាស្ទ្រីប និងក្នុង  រយៈពេលមួយថ្ងៃកន្លងមក «ក្នុងអំឡុងពេលប្រយុទ្ធ ការវាយប្រហារតាមអាកាស រួមទាំងការវាយប្រហារដោយរថក្រោះ និងកាំភ្លើងត្បាល់» នៅក្នុងតំបន់។ ពួកគេបាន «សម្លាប់ភេរវកររាប់សិបនាក់»។

កាលពីព្រឹកថ្ងៃសុក្រ យោធាអ៊ីស្រាអែល បានបើកប្រតិបត្តិការមួយនៅជិតទីក្រុងខាន់ យូនីស ( Khan Younis) នៅផ្នែកខាងត្បូងនៃដែនដីប៉ាឡេស្ទីន។ សេវាសារព័ត៌មាន បានបញ្ជាក់ទៀតថា៖«កងពលធំលេខ៩៨ បច្ចុប្បន្ន កំពុងប្រតិបត្តិការប្រឆាំងនឹងគោលដៅភេរវករ នៅក្នុងតំបន់នេះ។