សៀមរាប ៖ ឯកឧត្ដម ហេង ធូ ប្រធានក្រុមការងារគណបក្សប្រជាជនកម្ពុជាចុះមូលដ្ឋានឃុំខ្នារសណ្ដាយ បានបើកកិច្ចប្រជុំបូកសរុបលទ្ធផលប្រចាំខែសីហា និងលើកទិសដៅអនុវត្តន៍ការងារបន្ត នៅស្នាក់ការគណបក្សឃុំ ស្ថិតក្នុងស្រុកបន្ទាយស្រី ខេត្តសៀមរាប នាថ្ងៃទី១១ ខែសីហា ឆ្នាំ២០២៤នេះ។

ក្នុងកិច្ចប្រជុំនោះ ប្រធានគណៈកម្មាធិការគណបក្សឃុំ និង ប្រធានសាខាបក្សភូមិទាំង៧ នៃឃុំខ្នារសណ្ដាយ បានរាយការណ៍ពីផែនការសកម្មភាព សម្រាប់អនុវត្តន៍សម្រាប់ខែសីហា និងស្ថានភាពនៃការចុះពង្រឹង និងចងក្រងសមាជិកបក្ស គ្រួសារបក្ស ក្រុមបក្ស និងសកម្មភាពចិញ្ចឹមចលនា នាពេលកន្លងមក។ ទន្ទឹមនោះ ក្រុមការងារគណបក្សស្រុក ក្រុមការងារយុវជនគណបក្សខេត្ត ចុះមូលដ្ឋានឃុំ ក៏បានធ្វើការពិភាក្សាយ៉ាងផុលផុសលើការងារក្នុងមូលដ្ឋានផងដែរ។

ឯកឧត្ដម ហេង ធូ ប្រធានក្រុមការងារគណបក្សប្រជាជនកម្ពុជាចុះមូលដ្ឋានឃុំខ្នារសណ្ដាយ បានកោតសរសើរ ដល់ក្រុមការងារគណបក្សទាំងថ្នាក់ខេត្ត ស្រុក ឃុំ និងភូមិ ដែលបានបង្ហាញពីឆន្ទ:អនុវត្តន៍ការងារនៅមូលដ្ឋាន ក្រោមការដឹកនាំរបស់គណបក្សប្រជាជនកម្ពុជា។ ជាមួយនោះ ឯកឧត្តម បានផ្ដល់អនុសាសន៍ដល់ សមាជិកបក្ស ត្រូវបន្តបង្កើតក្រុមការងារយុវជន និងធ្វើបច្ចុប្បន្នភាពសមាជិកគណបក្ស ដោយបែងចែកឱ្យបានច្បាស់លាស់ពីស្ថានភាពរបស់សមាជិកបក្ស ជាពិសេសលើករណីធ្វើចំណាកស្រុក ទៅបណ្ដាខេត្តផ្សេង ឬប្រទេសណាមួយ។ឯកឧត្ដម ហេង ធូ បញ្ជាក់ថា ការរៀបចំស្ថិតិសមាជិកបក្ស នៅក្នុងមូលដ្ឋានឱ្យបានត្រឹមត្រូវ គឺជាការបង្កលក្ខណៈងាយស្រួលក្នុងការផ្ដល់ការយកចិត្តទុកដល់គ្រួសារ ដែលមានជីវភាពទន់ខ្សោយ ដើម្បីទទួលបានជាជំនួយផ្សេងៗ មិនតែប៉ុណ្ណោះបើទោះបីជាពួកគាត់ចំណាកស្រុក តែក្រោយពេលដែលពួកគាត់ត្រឡប់មកវិញ ក៏មានឈ្មោះនៅក្នុងគណបក្សប្រជាជនដដែល ដោយសារតែពួកគាត់ត្រូវបានក្រុមការងាររក្សាទុកនៅក្នុងសៀវភៅគ្រួសារបក្សរួចហើយ។ឯកឧត្ដម បន្ថែមថា ការរៀបចំផែនការសកម្មភាព ពង្រឹង និងពង្រីកសមាជិកបក្សជាយុវជន ការបញ្ចូលសមាជិកបក្សថ្មីជាយុវជន និងការបណ្តុះបណ្តាលសមាជិកបក្ស គឺដើម្បីឈានទៅបង្កើនសមាជិកបក្សទាំងបរិមាណ និងគុណភាព ស្របតាមគោលការណ៍របស់គណបក្សគឺ រក្សាចាស់បង្កើនថ្មី បន្តយកចិត្តទុកដាក់លើស្ថានភាព ជីវភាព សមាជិកគណបក្សយើងឱ្យបានដិតដល់ជាទីបំផុត ទើបអាចធានាបាននូវការរក្សាបរិមាណ ដែនឹងឈានដល់ការបង្កើនឡើងសមាជិកថ្មីប្រកបដោយចីរភាព។ឆ្លៀតក្នុងឱកាសនោះ ឯកឧត្ដមប្រធានក្រុមការងារគណបក្សប្រជាជនកម្ពុជាចុះមូលដ្ឋានឃុំ ក៏បានទទួលយកសំណើររបស់សមាជិកបក្ស ដែលស្នើសុំសូឡាបំភ្លឺផ្លូវ ដើម្បីដាក់នៅតាមដងផ្លូវ ដែលមានប្រវែងប្រមាណ ១ ០០០ម៉ែត្រ ដើម្បីលើកកម្ពស់សោភណ្ឌភាព ហេដ្ឋារចនាសម្ព័ន្ធ និងចូលរួមបង្ការនូវគ្រោះថ្នាក់ចរាចរណ៍នាពេលយប់ ព្រមទាំងសន្តិសុខសុវត្ថិភាពក្នុងឃុំ។ ជាមួយនោះ ឯកឧត្ដម ប្រធានក្រុមការងារ ក៏បានឧបត្ថម្ភថវិកាដល់សមាជិកបក្ស ដែលមានវត្តមាននាពេលនោះ ក្នុងម្នាក់ៗ៥ម៉ឺនរៀលផងដែរ៕