ក្រុមមន្ត្រីបាននិយាយកាលពីថ្ងៃសៅរ៍ (១០ សីហា) ថា ប្រធានតុលាការកំពូល និងទេសាភិបាលធនាគារកណ្តាលរបស់ប្រទេសបង់ក្លាដែស បានលាលែងពីដំណែង ខណៈការតវ៉ារបស់និស្សិត ដែលបង្ខំឱ្យនាយករដ្ឋមន្ត្រី លោកស្រី សេក ហាស៊ីណា (Sheikh Hasina) លាលែងពីតំណែង និងរត់ភៀសខ្លួន បានពង្រីកដើម្បីកំណត់គោលដៅលើមន្ត្រីជាច្រើនទៀតដែលត្រូវបានតែងតាំងក្នុងអំឡុងពេលលោកស្រីកាន់តំណែង។

ទីប្រឹក្សាក្រសួងយុត្តិធម៌ លោក អាសីហ្វ ណាសរ៉ុល (Asif Nazrul) បាននិយាយនៅក្នុងការបង្ហោះវីដេអូលើបណ្ដាញសង្គមហ្វេសប៊ុកថា ប្រធានតុលាការ លោក អូបៃឌុល ហាសាន (Obaidul Hassan) បានលាលែងពីតំណែង បន្ទាប់ពីនិសិ្សតបានព្រមានលោកពី «ផលវិបាកធ្ងន់ធ្ងរ» ប្រសិនបើលោកមិនធ្វើបែបនោះ។ លោក Nazrul ដែលជាទីប្រឹក្សានៅក្នុងរដ្ឋាភិបាលចាំផ្ទះថ្មី បានជំរុញឱ្យក្រុមអ្នកតវ៉ារក្សាសន្តិភាព។

ទីប្រឹក្សាក្រសួងហិរញ្ញវត្ថុ លោក សាលេហ៊ូឌីន អាម៉េដ (Salehuddin Ahmed) បានប្រាប់អ្នកយកព័ត៌មាន លោក អាបឌួ រូហ្វ តាលូកឌើ (Abdur Rouf Talukder) ទេសាភិបាលធនាគារបង់ក្លាដែស ក៏បានលាលែងពីតំណែងផងដែរ ប៉ុន្តែការលាលែងនេះមិនទាន់ត្រូវបានទទួលយកទេ ដោយសារភាពសំខាន់នៃមុខតំណែងរបស់លោក។ ប៉ុន្មានថ្ងៃមុននោះ ទេសាភិបាលរងចំនួនបួនរូបត្រូវបានបង្ខំឱ្យលាលែងពីតំណែង បន្ទាប់ពីមន្ត្រីធនាគារប្រហែល ៣០០ទៅ ៤០០នាក់ បានតវ៉ាប្រឆាំងនឹងអ្វីដែលពួកគេនិយាយថាជាអំពើពុករលួយរបស់មន្ត្រីជាន់ខ្ពស់។

សាកលវិទ្យាធិការរងនៃសាកលវិទ្យាល័យ ដាកា (Dhaka) លោក ម៉ាកស៊ូដ កាម៉ាល់ (ASM Maksud Kamal) ក៏បានលាលែងពីតំណែងផងដែរ។ សាកលវិទ្យាល័យនេះគឺជាចំណុចកណ្តាលនៃការតវ៉ាដ៏ហិង្សានៅក្នុងខែកក្កដា ប្រឆាំងនឹងកូតាការងាររបស់រដ្ឋាភិបាល ដែលបានសម្លាប់មនុស្សរាប់រយនាក់ មុនពេលក្លាយជាយុទ្ធនាការទម្លាក់តំណែងលោកស្រី Hasina៕